- A xornada “Cóidome”, celebrada hoxe no Auditorio, tratou asuntos coma o descanso, a actividade física ou o uso axeitado de medicamentos

- Os ámbitos educativo, xuvenil, familiar e laboral serán aos que se dirixan as diferentes accións

^{Valga, 13 de maio 2024.}

^{O Plan de Prevención das Condutas Adictivas, que o Concello de Valga comparte con Dodro, Padrón, Rois e Rianxo, inicia unha nova campaña de actividades para advertir sobre as consecuencias do consumo de drogas, legais ou ilegais, e doutras adiccións relacionadas coas tecnoloxías ou o xogo, por exemplo. Este proxecto, que leva en marcha dende o ano 2013, ten como finalidade atender as demandas de información, asesoramento, formación e intervención en diferentes ámbitos (familiar, escolar, xuvenil ou laboral) e desenvólvese en colaboración con diversos axentes sociais coma centros educativos e ANPAS, forzas de seguridade, centros de saúde, técnicos de xuventude, departamentos de Servizos Sociais, centros deportivos ou asociacións, entre outros.}

^{As actividades en Valga iniciáronse esta mañá coa iniciativa “Cóidome”, organizada en colaboración co Centro de Información á Muller (CIM) no marco da programación conmemorativa do 8-M. Foi unha xornada formativa sobre hábitos de vida saudables na que se ofrecer unha serie de consellos para acadar o benestar físico e tamén psíquico e mental. Tratáronse asuntos coma o descanso, a actividade física, o uso axeitado de medicamentos e outros coidados sanitarios e a hixiene.}

^{Durante os vindeiros meses realizaranse outras accións orientadas, por exemplo ao ámbito escolar, dende Primaria ata o remate da educación obrigatoria, para tratar de reducir o impacto de factores de risco asociados ao consumo de drogas, a adicción ás tecnoloxías e ás redes sociais ou ás apostas online. Esta é unha poboación de especial risco, polo que é fundamental dotalos das ferramentas necesarias para evitar o consumo ou retrasar o seu inicio.}

^{Durante a etapa xuvenil a percepción do risco é practicamente inexistente e na que as presións de grupo exercen unha grande influencia. Por iso, os mozos deben contar con información suficiente e pautas que lles axuden a afrontar as situacións de cambio ás que se van a enfrontar no seu día a día, ofrecéndolles alternativas de ocio saudables e explicándolles a quen poden acudir cando se lles presenten problemas ou dúbidas.}

^{O ámbito familiar e outro no que incidirán as actividades do Plan de Prevención. A familia é o axente socializador máis importante co que contan os menores, polo que é necesario dotar aos pais ou titores de estratexias para a xestión de conflitos relacionados coas adiccións e para mellorar a comunicación, dándolles unha serie de pautas coa que traballar a disciplina e o establecemento de normas.}

^{Por último, en canto ao ámbito laboral, traballarase con persoal das empresas dos cinco concellos, dando prioridade a sectores coma a hostalería.}