- A zona contará con novo pavimento e mobiliario, renovaranse as canalizacións e servizos e terá prioridade peonil

- O proxecto é financiado integramente pola Xunta de Galicia

^{Valga, 30 de xaneiro de 2024.}  

^{As obras de acondicionamento da Praza do Souto, coas que quere poñer en valor este espazo de Pontevalga, están en execución por parte da empresa Covsa.}

^{Antes do Nadal xa se realizaran na zona traballos preparatorios, coma a demolición do pavimento existente, a retirada do vello mobiliario e canalizacións e a adaptación de arquetas á nova cota, pero foi nos últimos días cando deu comezo o proxecto de humanización, co que se pretende converter esta praza nun lugar seguro e funcional, favorecendo o seu uso por parte dos veciños e reforzando a súa conexión cos equipamentos e espazos anexos, coma o Edificio de Usos Administrativos e a Praza Manuel Vicente Cousiño.}

^{As obras inclúen a dotación de novo pavimento en toda a praza e renovación das beirarrúas con pedra de granito e adoquín. Actualizaranse tamén as instalacións de saneamento e abastecemento e soterraranse as líñas aéreas de servizos. Por último, está previsto instalar nova iluminación.}

^{A zona pasará a ter prioridade peonil coa eliminación, ao máximo, do tráfico de vehículos, e limitándoo só a residentes.}

^{En total estanse a investir 240.330 euros, aportados integramente pola Xunta de Galicia.}