- Os aprendices completaron un módulo no que se analizaron os principais problemas que amezan o medio ambiente

- Tamén participaron en visitas ao Punto Limpo e a un composteiro

^{Valga, 26 de xaneiro de 2024.}

^{O Obradoiro de Emprego Xóvenes II impartiu nos últimos días un módulo de Sensibilización Ambiental ao que asistiron os dezaseis alumnos que participan neste proxecto formativo, compartido polos concellos de Valga e Moraña e que está confinanciado pola Unión Europea mediante o programa FSE+Galicia 2021-2027.}

^{O módulo, de nove horas de duración, foi impartido polo experto docente de forestais, José Manuel Picallo. Introduciuse ao alumnado no coñecemento dos principais problemas ambientais actuais –a contaminación, o cambio climático, a desertización...– e a súa relación coas dúas especialidades que se imparten no Obradoiro: albanelería e forestais. O obxectivo é fomentar as boas prácticas ambientais, tanto a nivel xeral coma no ámbito laboral, e concienciar aos aprendices sobre a importancia da acción individual para minimizar os impactos negativos sobre o medio ambiente e avanzar cara un desenvolvemento sostible.}

^{Para reforzar esta aprendizaxe, a mestra composteira do Concello, Silvia Torres, participou nunha xornada co alumnado na que fixo fincapé na importancia da correcta separación de residuos para favorecer a súa reciclaxe. Realizaron unha visita ao Punto Limpo e tamén ao composteiro comunitario da Avenida da Coruña, onde lles explicou en que consiste e como se realiza a compostaxe, que permite converter os restos orgánicos en abono.}

^{Sobre esta cuestión cabe sinalar que todos os restos das podas que se realizan nas prácticas da especialidade de forestais son triturados para despois utilizalos no proceso de compostaxe.}