- San Roque e San Antón acompañaron hoxe a San Paio nun percorrido de case catro quilómetros entre a igrexa de Cordeiro e a capela de Vilar

- O Concello aportará dúas patas de porco á procesión da Candeloria para contribuír ao mantemento desta tradición

^{Valga, 25 de xaneiro de 2024.}

^{San Roque e San Antón xa están en Vilar, a onde se trasladaron hoxe en procesión para acompañar a San Paio na súa capela ata o vindeiro 2 de febreiro, día da Candeloria, cando os tres regresarán á igrexa parroquial de Cordeiro na popular Procesión dos Lacóns.}

^{Esta mañá, como manda a tradición, San Paio achegouse ata a igrexa de Cordeiro para recoller aos outros dous santos e conducilos ata a súa aldea. Foron levados a pé por un grupo de veciños da parroquia, realizando o percorrido inverso ao da Procesión dos Lacóns. Case catro quilómetros en total pasando polos lugares de Beiro, Ferreirós, Outeiro, As Eiras, Moldes e Vilarello.}

^{Esta camiñada, a diferencia da do día da Candeloria, non fai paradas, tan só unha breve nas Eiras, na “casa de Furelos”, para repoñer algo de forzas e continuar a ruta, que contou co acompañamento musical do grupo de gaiteiros Os Bubelas, de Rois, e ía encabezada por un fogueteiro que marcaba o paso polas diferentes aldeas co lanzamento dunha bomba.}

^{En cada lugar, algúns veciños ían sumándose á comitiva, cada vez un pouco máis numerosa. En Vilarello, como é habitual, os nenos da escola unitaria saíron a ver o paso da procesión e a gozar coa música tradicional. E, xa no límite con Vilar, uníronse aos camiñantes os usuarios do CODI, que completaron o traxecto ata a capela}

^{Antano, lembran os veciños, a festa da San Paio dábaa unha parella que acababa de casar, para bendicir o matrimonio. Pero esta tradición foise perdendo co tempo e, este ano, foron Divina López, o seu fillo José Manuel, e o seu xenro, Necesio Gallego, os que organizaron os actos, que remataron cunha misa solemne ás 12:30.}

^{Esta xornada marca o inicio da conta atrás para a Procesión dos Lacóns, unha das tradicións culturais e relixiosas máis antigas e sobranceiras de cantas se celebran en Valga. Mañá e entre o luns e o xoves da próxima semana celebrarase a novena na capela de San Paio, con misas ás 16:30 horas.}

^{O venres, 2 de febreiro, será o día grande, coa festividade da Candeloria. Ás 10:00 horas terá lugar en Vilar a bendición das candeas e, a continuación, sairá a procesión, cos veciños –tradicionalmente mulleres– portando sobre as súas cabezas cestas con lacóns. O Concello, que decretou a xornada coma festivo local, aportará este ano dúas patas de porco para contribuír ao mantemento do patrimonio local.}

^{Esta tradición remóntase ao século XIX, cando un andazo de peste causou unha grande mortaldade entre o gando e os veciños comezaron a realizar ofrendas aos santos –un deles San Antón, patrón dos animais– en busca da súa intercesión.}