- Persoal municipal, do CIM e do CODI participaron nunha concentración silenciosa en memoria das vítimas

- Os usuarios do CODI repartiron lazos e xabóns conmemorativos

^{Valga, 24 de novembro de 2023.}  

^{O persoal do Concello celebrou este mediodía unha concentración silenciosa en repulsa polos asasinatos de mulleres vítimas de violencia de xénero.}

^{Representantes do goberno local, encabezados polo alcalde, José María Bello Maneiro, traballadores municipais, persoal do Centro de Información á Muller e usuarios do CODI asistiron ao acto celebrado ás portas da Casa do Concello.}

^{Os usuarios do CODI repartiron entre os participantes lazos violetas e xabóns conmemorativos do 25-N que eles mesmos elaboraron na actividade "Creando igualdade".}

^{Tralo minuto de silencio, deuse lectura a un manifesto:}

^{"O Concello de Valga conmemora o Día Internacional para a eliminación da violencia de xénero uníndose e solidarizándose con todas aquelas mulleres vítimas, así coma coas súas familias, amizades e achegados.}

^{Fai 23 anos que, dende a Asemblea Xeral da ONU, se designou o 25 de novembro do o Día Internacional para a eliminación da violencia contra a muller e, moi tristemente, esta continúa a ser unha realidade que abordar e transformar para acadar unha sociedade xusta e igualitaria.}

^{No que levamos de ano, a violencia machista amosounos a súa expresión máis dura e cruel con 52 asasinatos que deixaron a 51 menores orfos. Asasinatos que non podemos entender coma simples datos, senón como vítimas con vidas arrebatadas e familias destruídas pola violencia, como traxicamente coñecemos no noso concello de primeira man.}

^{Por iso, como sociedade debemos unirnos, sumar forzas e implicarnos activamente para erradicar a violencia de xénero. Esta loita e a  posibilidade de extinguir o patriarcado e a súa ideoloxía machista interpela a toda a sociedade, está en mans de todas as persoas que a formamos. Non podemos esquecer é que indispensable activar o sentimento de responsabilidade nos homes para que, de maneira individual e colectiva, sinalen as condutas e actitudes machistas propias dos seus iguais, e se afasten delas.}

^{Hai que desobedecer os mandatos da masculinidade máis tradicional e dominante que se realimenta moi a miúdo e en todos os ámbitos, especialmente nos últimos anos nas redes sociais e os espazos dixitais. Necesitamos crear novos referentes para construír masculinidades responsables, libres, igualitarias, diversas, inclusivas e coidadoras. Só así, tecendo alianzas, poderemos construír unha comunidade que garanta os dereitos de todas as persoas.}

^{Como administración temos a obriga de poñer en marcha todas as medidas posibles contra esta lacra social, reforzando todos os mecanismos de prevención, atención, apoio e protección ás mulleres vítimas. Así mesmo, é de vital importancia promover a educación en igualdade en todos os niveis educativos, entendéndoa coma a ferramenta máis eficaz para erradicar a violencia contra as mulleres, que na actualidade representa a máxima expresión da masculinidade.}

^{Facer fronte a este desafío non é sinxelo pero, sen lugar a dúbidas, é preciso para acadar unha sociedade xusta e na que todas as persoas poidan participar e desenvolverse de forma igualitaria".}