- Boris Perrenoud, director da Academia de Música de Viena, estivo á fronte das sesións musicais

- O alumnado ofreceu o domingo un concerto no Auditorio Municipal

^{Valga, 20 de novembro de 2023.}

^{O alcalde, José María Bello Maneiro, e o conselleiro de Cultura, Román Castro, clausuraron este domingo no Auditorio Municipal o encontro de dirección e orquestra organizado polo Centro Superior de Música (CSM Galicia), que contou coa asistencia de corenta alumnos, algúns deles chegados dende puntos tan lonxanos como Australia ou Denver (Colorado).}

^{Boris Prrenoud, director da Viena Music Academy, Liina Leijala, directora do Baremboin-Sait Music Center e profesora do CSM, e Simón Ibáñez, director do CSM, estiveron á fronte das sesións musicais nas que os participantes traballaron as obras “Concerto nº1 en SolM para frauta” de Mozart –con Ariadna Landrove Santana como solista–, a “Sinfonía nº7” de Beethoven, e a Obertura “Las Hébridas” de Mendelsoohn. Este foi tamén o repertorio que interpretaron no concerto de clausura celebrado na tarde do domingo.}

^{Na actividade formativa participaron tanto estudantes do Grao Superior de Música que se imparte no CSM, coma do Promotion Program, unha iniciativa que o centro puxo en marcha este curso e que ofrece aos alumnos a posibilidade de participar en concertos e recitais en teatros internacionais e compartir escenario con profesionais de prestixio. “É un programa único, pola promoción que pode dar aos alumnos”, destacou o mestre Boris Perrenoud. No mesmo sentido, Simón Ibáñez, engade que “o Promotion Program dalles aos participantes a posibilidade de actuar como solistas e de traballar con músicos de renome, algo que outros centros non lles ofrecen”.}

^{No acto de clausura do encontro, o alcalde subliñou o salto que, no ámbito da formación musical, supuxo para Valga a inauguración en 2019 CSM, reforzando o percorrido xa iniciado en 1996 coa fundación da Escola Municipal de Música e en 1999 coa creación da Banda Municipal. O crecemento no número de alumnos, que pasou de 30 a 74 nestes catro anos, e a expansión internacional do centro son un indicativo do bo funcionamento do CSM, que aposta porque a formación non quede limitada só á aula, conscientes das dificultades que os estudantes poden ter á hora de acceder ao mundo laboral.}

^{O conselleiro, pola súa parte, lembrou a sorpresa que supuxo para el o momento en que o alcalde lle presentou o proxecto para abrir un centro de estudos superiores de música en Valga, o que puxo ao concello ao nivel das dúas grandes cidades galegas, A Coruña e Vigo, as únicas que ata entón ofrecían esta formación.}