- Será impartido por especialistas da Federación Galega de Loita e pertencentes ás forzas de seguridade do Estado

- Ofreceranse consellos de autoprotección e, na parte práctica, traballaranse técnicas coas que repeler agresións

^{Valga, 7 de novembro de 2023.}

^{O Concello de Valga, en colaboración coa Secretaría Xeral de Igualdade, organiza un curso de defensa persoal para mulleres que se impartirá os días 20 e 24 de novembro no Auditorio Municipal, en horario de 16:30 a 20:30. A actividade é gratuíta e diríxese a mulleres empadroadas en Valga, maiores de idade, que deben inscribirse no Concello ou no Auditorio Municipal. O prazo estará aberto ata o día 17.}

^{As dúas sesións estarán dirixidas por especialistas da Federación Galega de Loita pertencentes ás Forzas e Corpos de Seguridade do Estado. As participantes recibirán formación que lles permita evitar situacións de risco para elas ou repeler unha agresión.}

^{Parte do curso estará centrada na explicación de medidas de autoprotección, indicando ás participantes como poden detectar e avaliar situacións de risco e ofrecéndolles unha serie de consellos que lles permitan sentirse máis seguras en determinadas circunstancias, por exemplo se atopan soas durante a noite ou en lugares pouco transitados.}

^{Tamén haberá unha parte práctica na que traballarán unha serie de técnicas sinxelas e que non requiren de ningunha condición física específica nin dunha idade determinada, pero que son eficaces á hora de zafarse unha agresión ou frear unha ameaza.}