- O alcalde e parte da Corporación felicitárona pola seu logro deportivo e animárona a traballar para máis trunfos

- A piragüista asinou no Libro de Ouro e recibiu unha placa en recordo do seu éxito

Valga, 5 de setembro de 2023.
Nerea Novo, flamante campioa do mundo de maratón en categoría C1 júnior, foi recibida esta mañá no Concello para recibir unha homenaxe trala xesta deportiva lograda no Campionato do Mundo disputado en Dinamarca. O alcalde, José María Bello Maneiro, e os membros do grupo de goberno Carmen Gómez, Pedro Calvo e Malena Isorna, xunto ao concelleiro do BNG Francisco Devesa felicitárona en nome de toda a Corporación e, por extensión, de todos os veciños de Valga.

A piragùista de Outeiro (Cordeiro) recibiu un ramo de flores e unha placa de prata coa lenda “Nerea Novo Romero, campioa do mundo júnior feminina. 31 de agosto de 2023”, un día que, en palabras do alcalde, quedará para sempre coma unha data sinalada en Valga. Agradecida e orgullosa polas homenaxes e actos de recoñecemento que se lle están a facer, Nerea tamén asinou no Libro de Ouro do Concello.

Nun Salón de Plenos no que se deron cita familiares, veciños e traballadores municipais, a deportista sinalou que “estou moi contenta de estar aquí, de todo o conseguido esta temporada, pero non se acaba. Na temporada seguinte, a por máis”, unhas palabras que arrancaron os aplausos de todos os presentes. O alcalde fixo fincapé na importancia do acadado por Nerea: campioa de España, subcampioa de Europa e campioa do mundo. “Parece incrible con 16 anos”, recalcou Bello Maneiro. “Para Valga é un orgullo e unha honra”, engadiu.

O primeiro edil tamén se referiu ao “gran traballo” que hai detrás deste campionato do mundo, que “non é froito dun día, senón dun traballo continuo” e pediu unha maior atención, tanto por parte das administracións coma dos medios de comunicación, para os deportes minoritarios coma o piragüismo”.