- O xurado visitou as obras de acondicionamento executadas polos veciños con materiais aportados polo Concello

- As tres actuacións máis valoradas recibirán premios de 300, 200 e 100 euros

^{Valga, 22 de agosto de 2023.}

^{O concurso Embelecer Valga ten xa gañadores, aínda que estes non se farán públicos ata o vindeiro sábado, no acto de entrega de premios da XXXIII Festa da Anguía e Mostra da Caña do País. O xurado xa emitiu a súa votación despois de percorrer os parques, espazos e infraestruturas públicas participantes, locen estes días a súa mellor imaxe.}

^{Este certame premia ao lugar máis fermoso acondicionado e engalanado polos veciños e é convocado anualmente polo Concello co obxectivo de implicar á cidadanía no coidado dos lugares públicos, acometendo proxectos de mellora e accións de limpeza, mellora, dotación de equipamentos ou ornamentación. O Concello aporta os materiais necesarios para a realización das obras.}

^{Un total de dezanove lugares das distintas parroquias participaron nesta edición do concurso e o pasado sábado foi o día no que recibiron a visita do tribunal, formado por un representante de cada comisión veciñal participante e os concelleiros de Cultura, Turismo e Facenda. Valoraron aspectos coma o deseño de xardíns e zonas recreativas, a orixinalidade e creatividade da decoración, o aproveitamento de recursos da zona e uso de materiais de refugallo.}

^{As actuacións levadas a cabo foron as seguintes:}

1. ^{Balleas: Acondicionamento do parque}
2. ^{Barcia: Mantemento do parque}
3. ^{Barro: Melloras no local social e mantemento do parque}
4. ^{Beiro: Mantemento do parque e do lavadoiro}
5. ^{Campaña (Igrexa): mantemento da contorna da igrexa}
6. ^{Canle: Acondicionamento do parque}
7. ^{Carballiño: Adecentamento do parque do Quinteiro}
8. ^{CEIP Baño-Xanza: Remodelación da biblioteca e melloras no patio}
9. ^{CODI: Actuacións de mellora nos espazos exteriores do centro}
10. ^{CRA de Valga: Arranxo de espazos exteriores das escolas}
11. ^{Eiras: Melloras no lavadoiro}
12. ^{Escola Infantil Municipal: Melloras no patio exterior}
13. ^{Ferreirós: Acondicionamento de talude na estrada PO-190}
14. ^{Ferreirós: Melloras no parque}
15. ^{A Medela: Acondicionamento de fonte e lavadoiro e da súa contorna}
16. ^{Raxoi: Melloras no lavadoiro e nos arredores deste elemento patrimonial}
17. ^{Reguengo: Melloras no lavadoiro do lugar}
18. ^{Vilar: Traballos de mantemento e acondicionamento no parque, no Campo Labeiro e no Miradoiro da Perdiz}
19. ^{Vilarello: Mantemento da casa veciñal e da súa contorna, do parque e dos lavadoiros da aldea}

^{O proxecto mellor valorado será premiado con 300 euros e o segundo e terceiro clasificados recibirán 200 e 100 euros, respectivamente. As demais comisións participantes recibirán un diploma e unha gratificación de 100 euros.}

^{Ademais, entregarase un premio especial de 150 euros para o lugar con mellor mantemento durante todo o ano.}