- A estrutura acaba de entrar en servizo trala execución das obras, nas que se investiron 48.261 euros

- O goberno local está a apostar pola mobilidade sustentable creando circuítos seguros para os desprazamentos a pé ou en bicicleta

^{Valga, 15 de agosto de 2023.}

^{A senda peonil que comunica a Rúa Doutor Oya Salgueiro, en Pontevalga, coa zona do Carballiño (Xanza) xa está completa, despois de que, nos últimos días, entrara en servizo a pasarela de madeira instalada para salvar o río Valga, que dividía o circuíto en dous tramos.}

^{A estrutura, na que se investiron 48.261’19 euros do Plan Concellos, ten dous metros de ancho e non afecta á capacidade hidráulica do río. De feito, as obras contaron con autorización de Augas de Galicia.}

^{Con esta pasarela evítase que os usuarios da senda teñan que entrar na estrada no tramo que discorre sobre o río. Desta maneira, vese reforzada a seguridade xa que peón e vehículos dispoñen de carrís totalmente independentes e separados.}

^{Con esta actuación complétase o proxecto de construción da senda entre O Carballiño e Pontevalga, que ten arredor dun quilómetro de lonxitude, dous metros de ancho e pavimento de xabre, e coa que o goberno local segue a apostar pola mobilidade sustentable, creando circuítos seguros para os desprazamentos a pé ou en bicicleta.}