- Os bares inscritos son Caprichos, Maneiro, Potel, Couceiro, Auditorio, Palmera Beach, Pardal, Comparada e Pontellón

- Os petiscos poderán degustarse gratis coas consumicións os días 19, 20, 26 e 27 de agosto

^{Valga, 10 de agosto de 2023.}

^{A Ruta-Concurso “Tapa a Anguía”, que o Concello convoca anualmente dentro da programación da Festa da Anguía e Mostra da Caña do País, xa ten establecementos participantes. Serán un total de nove: Pastelería Caprichos, Bar Maneiro, Bar Potel, Café-Bar Couceiro, Cafetería Auditorio, Bar Pardal, Palmera Beach, Casa Comparada e O Pontellón Café-Bar.}

^{A actividade gastronómica, que cumpre o seu décimo aniversario, trata de promocionar un dos produtos estrela da festa, a anguía, e incentivar o consumo nos locais de hostalería do municipio. O Concello será o encargado de facerlles chegar o peixe xa limpo para que poidan preparar as tapas.}

^{A ruta prolongarase durante as dúas últimas fins de semana do mes de agosto. O apartado de concurso celebrarase unicamente os días 19 e 20, mentres que na seguinte fin de semana (días 26 e 27) tan só haberá degustación. Os petiscos serviranse de xeito gratuíto coas consumicións os sábados en horario de 12:00 a 15:00 e de 20:00 a 23:00 e os domingos de 12:00 a 15:00 horas.}

As tapas coas que participan os diferentes establecementos son:

- Bar Pardal: Pesto de anguía

- Café bar O Pontellón: Anguía ao estilo Pontellón

- Palmera Beach Valga: Paella de anguía á mariñeira

- Café bar Couceiro: Anguía ao forno con salsa de anguía

- Pastelería Caprichos: Tosta de anguía con crema de aguacate

- Cafetería Auditorio: Anguía no escenario

- Bar Maneiro: Anguía no seu punto

- Casa Comparada: Compa roliños

- Bar Potel: Anguía en salsa sofritida

^{O público decidirá cos seus votos cales son as mellores tapas e, polo tanto, os locais gañadores dos Mandís de Ouro, Prata e Bronce. Para participar na votación é preciso reunir os selos dos bares participantes despois de degustar as súas tapas e introducir a papeleta nas urnas habilitadas ao efecto. Entre todas as persoas que participen na elección das mellores tapas sortearanse dez vales de 30 euros cada un para gastar no comercio local.}

^{Mantense, ademais, o xurado profesional, que será o encargado de elixir a tapa que se degustará na Festa da Anguía do vindeiro ano 2024.}