- Impartiranse as especialidades de albanelería e forestais, cun total de 16 participantes de entre 16 e 30 anos

- As persoas que queiran aspirar a unha praza deben inscribirse cando antes no Servizo Público de Emprego

^{Valga, 14 de agosto de 2023.}

^{A Xunta de Galicia, a través da Consellería de Emprego, vén de aprobar unha subvención de 424.836’96 euros para a posta en marcha dun novo obradoiro de emprego conxunto para os concellos de Valga e Moraña, e dirixido a persoas de entre 16 e 30 anos que poderán formarse nas especialidades de forestais e albanelería.}

^{O obradoiro terá unha duración de 12 meses e poderán participar un total de 16 mozos que se atopen en situación de desemprego. As persoas que queiran optar a unha praza deben inscribirse no Servizo Público de Emprego nos seguintes módulos:}

• ^{Forestal: AGAR0208}
• ^{Albanelería: EOCB0108}

^{O obxectivo do programa é mellorar a empregabilidade dos participantes mediante a impartición de formación profesional en cada unha das especialidades elixidas. Esta parte teórica complementarase con prácticas profesionais consistentes na realización de obras de interese e utilidade pública. Deste xeito, os aprendices pasarán a contar cunha cualificación profesional que favorecerá a súa inserción no mercado laboral.}

^{En Valga as obras a executar incluirán o mantemento, acondicionamento e mellora do Camiño Portugués e de áreas de lecer coma Mina Mercedes, Porto Piñeiro, a praia fluvial de Vilarello, o monte de Beiro ou o Parque Irmáns Dios Mosquera. Tamén está previsto actuar nalgúns dos muíños tradicionais existentes no municipio e mellorar a sinalización da Ruta Mariana.}