- Trinta nenos de 4 a 12 anos asisten no recinto do CEIP Baño-Xanza á Escola de Verán

- En Vilarello reúnense unha quincena de mozos de 12 a 16 anos que participan nun campus deportivo 

^{Valga, 4 de agosto de 2022.}

^{A comezos desta semana, co inicio do mes de agosto, as actividades de conciliación despediron aos  participantes de xullo e deron a benvida aos  máis de corenta novos inscritos para o mes de agosto. Boa parte deles, ata trinta, danse cita de luns a venres no recinto do colexio Baño-Xanza, onde se desenvolve a Escola de Verán, dirixida a nenos de 4 a 11 anos de idade e na se desenvolven obradoiros, contacontos, baile, animación á lectura e xogos que fomentan a igualdade, a cooperación ou respecto medioambiental.}

^{Durante esta semana de toma de contacto, os cativos coñeceron a temática sobre a que van xirar boa parte das actividades que realicen: os detectives, polo que terán que ir resolvendo misterios e descubrindo enigmas. Esta mañá, por exemplo, unha pantasma “roubou” varios obxectos da contorna e os pequenos detectives tiveron que resolver a situación. Experimentos, xogos cooperativos, sesións sobre hábitos saudables e un taller deportivo con zumba e ioga foron outras das actividades que realizaron durante estes días.}

^{En paralelo, na praia fluvial de Vilarello danse cita unha quincena de mozos de entre 12 e 16 anos que participan nun campus deportivo organizado este verán por primeira vez. Na xornada inaugural, debido á chuvia, a actividade limitouse a xogos de mesa, pero o resto das xornadas realizaron unha xincana deportiva, xogaron ao bádmiton, voleibol, fútbol e xogos populares e realizaron un obradoiro de primeiros auxilios.}

^{Esta mañá desprazáronse andando dende Vilarello ata a Mina Mercedes, onde disputaron unha carreira de obstáculos empregando os diferentes elementos e xogos dos parques infantil e de calistenia.}

^{Estas actividades son gratuítas e teñen como obxectivo para favorecer a conciliación familiar coincidindo coas vacacións escolares.}