- Realizaron unha primeira entrega de 250 e antes de rematar o ano chegarán ata o medio milleiro

- A cesta coa que se agasalla aos bebés está composta por produtos feitos por diferentes entidades sociais de Galicia, entre elas Asdivalu

^{Valga, 21 de xullo de 2023.}

^{Os usuarios do CODI están a elaborar medio milleiro de babeiros para a Consellería de Política Social da Xunta, que os incluirá nas cestas benvida coas que se agasalla aos pais e nais que acaban de ter un fillo e que contén produtos básicos para os primeiros días de vida dos bebés.}

^{Trátase, ademais, dunha cesta solidaria, xa que os produtos que inclúe están elaborados ou rematados por usuarios de entidades sociais de Galicia destinadas á protección da infancia ou á atención das persoas con discapacidade. Entre estes colectivos está a Asociación de persoas con discapacidade dos vales Ulla e Umia (Asdivalu). A través dela, os usuarios do CODI fixeron xa unha primeira entrega de 250 babeiros que eles mesmos pintaron artesanalmente con motivos infantís.}

^{Aló polo mes de maio comezaron con esta tarefa, unha máis das actividades formativas, educativas e de integración que se desenvolven no centro. Nos vindeiros meses entregarán unha segunda remesa de babeiros ata completar un lote de 500.}