- O gañador na categoría de caña branca recibirá 500 euros e as mellores augardentes de herbas e tostadas acadarán 300 euros cada unha

- O prazo de inscrición estará aberto ata o día 22 de agosto

^{Valga, 20 de xullo de 2023.}

^{O Concello de Valga convoca o Concurso da Caña do País, unha iniciativa que se enmarca dentro da programación da XXXIII Festa da Anguía e Mostra da Caña do País, que se celebra na última fin de semana do mes agosto.}

^{Ao certame poden concorrer destiladores artesanais que estean empadroados en Valga, nas tres modalidades habituais: caña branca, tostada e de herbas.}

^{Coa finalidade de manter a imparcialidade do certame e o anonimato dos participantes, estes deberán presentar as augardentes nun envase específico que recollerán, con anterioridade, nas oficinas do Concello. Entregarán os licores debidamente embotellados e tamén un sobre pechado coa ficha de inscrición e datos persoais (enderezo e teléfono de contacto).}

^{O prazo permanecerá aberto ata as 14:00 horas do día 22 de agosto.}

^{Os premios que se repartirán entre os concursantes ascenden a 1.100 euros en total. O produtor da mellor caña branca será gratificado con 500 euros, mentres que os primeiros premios dos licores de herbas e tostado ascenderán a 300 euros. Os segundos clasificados recibirán un trofeo e un diploma conmemorativo} 

^{As catas das augardentes terán lugar os días 24 e 25 de agosto nas instalacións do Centro de Interpretación da Caña do País e os gañadores daranse a coñecer o día 26 durante os actos da XXXIII Festa da Anguía e Mostra da Caña do País.}

^{O vencedor de cada unha das modalidades quedará obrigado a entregar ao Concello o garrafón da augardente premiada.}