- O club Río Ulla e o Concello colaboran nesta actividade que fomenta a práctica deportiva entre os cativos

- Os adestramentos realízanse os martes e xoves a partir das doce do mediodía

^{Valga, 7 de xullo de 2023.}

^{O pavillón municipal de Baño acolle dende o pasado martes a Escola de Verán de Baloncesto, impartida polo club Río Ulla coa colaboración do Concello. Un total de trinta e dous rapaces de entre 6 e 12 anos participan nesta actividade que se desenvolve por terceiro ano consecutivo en Valga, co obxectivo de fomentar a práctica deportiva entre os cativos e ofrecerlles alternativas de lecer durante as vacacións estivais. Ademais, esta escola permítelle ao club organizador captar novos xogadores para os seus equipos.}

^{Dous adestradores encárganse dos diferentes grupos, distribuídos en función da idade e do nivel. Os máis pequenos reciben clases de iniciación con xogos e tarefas coas que traballan aspectos coma aprender a recibir o balón sen facerse dano nas mans.}

^{O grupo dos medianos céntrase en técnicas de perfeccionamento, posto que a maioría xa levan anos practicando este deporte e algúns incluso están en dinámica de selección galega. Os máis veteranos, pola súa parte, realizan sesións de tecnificación co obxectivo de acadar un maior rendemento.}

^{Esta Escola de Verán prolongarase ata o mes de agosto con sesións os martes e os xoves de 12:00 a 13:30 horas.}