- Os participantes estiveron onte á tarde en Valga vendo o Belén Artesanal, a Mina Mercedes, o Museo e o Centro de Interpretación da Caña do País

- O alcalde, José María Bello Maneiro, saudounos no Parque Irmáns Dios Mosquera e convidounos a regresar a Valga

^{Valga, 4 de xullo de 2023.}

^{Valga recibiu onte á tarde aos douscentos expedicionarios da Ruta Quetzal e, entre eles, a Irene Sanmarco e Amalia Saavedra, dúas mozas valguesas que están a compartir esta experiencia con algúns dos mellores expedientes académicos de España. Dende o pasado sábado e ata o día 14 están a percorrer diferentes zonas de Galicia e do norte de Portugal.}

^{Vilanova, A Illa e Valga foron algúns dos lugares aos que se achegaron nestas xornadas iniciais, e hoxe emprenden viaxe cara a localidade lusa de Ponte da Lima, onde teñen previsto realizar unha ruta en kayak, unha das actividades que Irene e Amalia agardan con máis ansia: “Temos moitas gañas”. Este inicio de ruta está a ser para elas “cansada, porque hai moitas camiñadas e temos pouco tempo para visitar moitos sitios, pero a xente e o ambiente que hai entre todos son incribles”, explican.}

^{En Valga, durante unhas horas tiveron a ocasión de visitar algúns dos principais puntos de interese, coma o Belén Artesanal en Movemento, o Museo da Historia ou o Centro de Interpretación da Caña do País. Ademais, fixeron unha ruta a pé dende a Mina Mercedes ata Pontevalga, pasando por zonas coma O Carballiño e A Bouza. Parque Irmáns Dios Mosquera foron saudados polo alcalde, José María Bello Maneiro, que lles dou a “benvida ás terras da Bella Otero” e desexoulles que aproveiten ao máximo e gocen desta experiencia. Ademais, convidounos a regresar a Valga coas súas familias e achegados. “Algúns dos nosos novos amigos, da Rioxa ou Valencia, queren volver”, confirman Amalia e Irene, “e tamén aos galegos que participan na ruta lles gustou moito Valga. No Belén fixémoslles de guías e encantoulles e tamén lles gustan moito as paisaxes tan verdes que temos”.}

^{Para despedir ao grupo, Bello Maneiro agasallou cunha reprodución do Petróglifo Pedra da Serpe ao promotor da Ruta, Íñigo de la Quadra-Salcedo, fillo do emblemático aventureiro Miguel de la Quadra, que estivo acompañando aos expedicionarios durante a súa estadía Valga.}