- A mostra, que pode verse na planta baixa da Casa Consistorial, reflexa como a figura e a imaxe de Carolina Otero permanecen na sociedade actual

- “Estamos orgullosos de que a Bella Otero nacera en Valga, a súa relevancia é indiscutible”, dixo a alcalde

^{Valga, 10 de abril de 2018.}

^{O Concello rendeu homenaxe esta mañá á valguesa máis internacional, a Bella Otero, con motivo do 53 aniversario do seu falecemento.}

^{O alcalde, José María Bello Maneiro, e a concelleira de Cultura, Mari Carmen Castiñeiras, inauguraron a exposición “A Bella Otero – 150 anos na memoria”, que pode verse na planta baixa da Casa Consistorial e que trata de transmitir a imaxe de Carolina Otero que permanece na sociedade actual. A Bella Otero segue a ser noticia, segue a protagonizar lembranzas, é modelo a seguir e símbolo publicitario pasados 150 anos do seu nacemento. A súa figura segue viva, tanto en Valga como nacional e internacionalmente, dando nome a rúas, a establecementos de hostalería ou perruquerías, por citar só uns exemplos.}

^{A mostra quere, precisamente, reflexar a pegada deixada pola Bella Otero, a muller morena con ollos de misterio e a alma chea de pena que pintou Julio Romero de Torres e á que despois cantou Manolo Escobar na canción “La morena de mi copla”. A estrela do Folies Bergère parisino segue a ser imaxe dos produtos máis diversos, como un perfume francés que se define como igual de picaresco que a vida da Bella Otero. Aínda está á venda por 98 euros, porque Carolina Otero é hoxe sinónimo de glamour, un icono para a moda e, en definitiva, unha figura que pervive na memoria colectiva.}

^{Un técnico do Museo da Historia explicou os contidos da exposición aos participantes no acto, entre os que se atopaban as concelleiras Carmen Gómez e Begoña Piñeiro e tamén Rosa Crespo e Jaime Escofet, que no ano 2000 deron orixe e rexistraron a variedade de camelia “Bella Otero”, unha flor de cor rosa forte. Un exemplar atópase ao lado da estatua da Bella Otero que hai no Parque Irmáns Dios Mosquera, a onde se dirixiron despois os participantes na homenaxe para realizar unha ofrenda floral.}

^{Durante os actos o alcalde afirmou que “a relevancia da Bella Otero é indiscutible” e lembrou que hai non moitos anos, falar sobre a bailarina en Valga “non estaba moi ben visto, sobre todo entre a xente máis maior. Daba vergoña”. Sen embargo, “este equipo de goberno non tivo dúbidas e traballou por recuperar a súa figura e a súa vida, que hoxe en día están plenamente asumidas. Estamos orgullosos de que a Bella Otero nacera en Valga”.}

^{O rexedor fixo fincapé en que unha das rúas que levan o nome da artista está en Valga. “Cambiámoslle o nome de Primo de Rivera polo da Bella Otero, un troco moi significativo”, incidiu. Tamén relatou algunhas anécdotas da viaxe que hai anos fixeron a Francia o propio alcalde a concelleira de Cultura, para coñecer máis de preto os últimos anos de vida de Carolina Otero. “Visitamos o cemiterio de Niza onde está enterrada e tamén o hotel onde pasou os seus últimos anos e que, segundo contan, era pagado polo Casino de Montecarlo”. Tamén se achegaron ao Moulin Rouge e, “ao saber que estaba alí o alcalde do pobo onde nacera a Bella Otero, convidáronnos a unha copa de champán”.}

^{Pola súa parte, a concelleira de Cultura destacou a incrible traxectoria de Carolina Otero: “de onde saiu e a onde chegou grazas ao seu carácter loitador e valente”.}

Máis fotos do acto: https://www.facebook.com/media/set/?set=a.234744080407386.1073741972.131969484018180&type=1&l=d84d07c710