- As actuacións terán lugar o sábado día 1 na área fluvial de Vilarello a partir das 23 horas

- Durante todo o día disputaranse as Olimpíadas da Aldea, para as que está aberto o prazo de inscrición

^{Valga, 23 de xuño de 2023.}

^{A décimo quinta edición da Festa da Xuventude, que se celebra o sábado 1 de xullo na área fluvial de Vilarello, xa ten cartel musical. A cantautora galega SÉS e o grupo América de Vigo, serán os encargados de amenizar a noite, a partir das 23:00 horas, e despois dunha xornada na que as actividades deportivas serán as protagonistas.}

^{SÉS será a encargada de abrir as actuacións coa súa mestura de música tradicional con blues, rock e canción de autor. Os seus concertos están marcados pola súa pola súa personalidade combativa e tamén pola experiencia e madurez que lle outorga máis dunha década de traxectoria musical. María Xosé Silvar presentará en Vilarello o seu octavo traballo discográfico, “Diante dun eco”, no que regresa aos seus inicios e no que destacan temas como “Cantan as balas” ou “Para cando eu morra”.}

^{A continuación subirá ao escenario o grupo América, un clásico das verbenas galegas con 47 anos de carreira dende que se fundara en 1976. Cun estilo característico e un coidado repertorio, a banda viguesa fará un repaso por algúns dos grandes éxitos do rock de todos os tempos, tratando de conectar con todo tipo de públicos.}

^{Olimpíadas da Aldea}

^{Ademais das actuacións musicais, durante toda a xornada do sábado disputaranse en Vilarello as Olimpíadas da Aldea, para as que está aberto o prazo de inscrición. Poden participar equipos formados por un mínimo de 4 persoas e un máximo de 6, todos a partir de 15 anos de idade. Os equipos serán mixtos e contarán cun mínimo de dúas persoas de cada xénero.}

^{Disputaranse simultaneamente ata cinco xogos e deportes: Fútbol praia, Brilé, Carreiras de sacos,  o Cangrexo e unha xincana. En cada un outorgaranse as correspondentes medallas douradas e prateadas aos primeiros e segundos clasificados, ademais de gratificalos con 200 e 100 euros respectivamente. En total, repartiranse 1.500 euros en premios.}

^{Unha vez rematadas as competicións, designarase ao campión absoluto das Olimpíadas, que será o equipo que máis medallas douradas acumule. En caso de empate, terase en conta tamén o número de medallas prateadas.}

^{O prazo para anotarse estará aberto ata as 13:00 horas do día 29 de xuño entregando no Concello a correspondente folla de inscrición cuberta ou enviándoa por correo electrónico ao enderezo Este enderezo de correo está a ser protexido dos robots de correo lixo. Precisa activar o JavaScript para velo.. A folla pode descargarse na páxina web municipal (https://www.valga.gal/atencion-cidada/impresos-solicitudes) ou recollerse en papel nas oficinas municipais.}