- Empregouse madeira de bambú tratada e tamén se substituíron as cordaxes da infraestrutura para maior seguridade

- Nesta área de lecer tamén se está a mellorar a varanda de madeira do auditorio ao aire libre

^{Valga, 26 de maio de 2023.}

^{Persoal municipal executou nas últimas semanas traballos de renovación no pantalán da área fluvial de Vilarello, que se atopaba deteriorado polo paso do tempo, as inclemencias meteorolóxicas e o uso durante anos. As melloras que se levaron a cabo consistiron na colocación dun novo piso de madeira que outorga maior estabilidade e seguridade á infraestrutura fluvial.}

^{Retiráronse todas as táboas que conformaban o pavimento anterior e substituíronse por outras novas de bambú tratado termicamente en alta presión. Os diferentes módulos están unidos á base do pantalán con parafusos ocultos. Este novo piso colocouse en toda a pasarela de acceso e tamén na estrutura flotante. Tan só se variou o tipo de madeira na zona exterior do pantalán, para a que utilizou madeira de pino tratada en autoclave. Esta é máis branda polo que se evitarán danos nas embarcacións que se aproximen á instalación para atracar en Vilarello.}

^{Os traballos completáronse coa renovación da cordaxe da varanda, para garantir a seguridade dos usuarios.}

^{Tamén na área lúdica de Vilarello se están a realizar traballos de mellora da varanda do auditorio ao aire libre. Ao igual que no pantalán, atópase deteriorada pola súa lonxevidade e uso. Neste caso son os aprendices do módulo de carpintería do Obradoiro de Emprego Ulla-Umia VI os que están a realizar as obras, consistentes na retirada dos vellos listóns de madeira para despois colocar outros novos.}