- A actividade foi promovida en colaboración co Fondo Galego de Cooperación do que é socio o Concello de Valga

- Unha técnica ambiental informou aos participantes sobre a sustentabilidade vencellada a auga e sobre a protección deste recurso

^{Valga, 11 de maio de 2023.}

^{Coa preocupante situación de seca que afecta a boa parte de España e o debate sobre a xestión da auga de máxima actualidade, o Concello –en colaboración co Fondo Galego de Cooperación e Solidariedade e co IES de Valga– desenvolveu unha actividade que puxo o foco sobre este recurso esencial para a vida pero cada vez máis escaso. Tratouse dunha acción de concienciación sobre a sustentabilidade vencellada á auga, entendida esta como un dereito fundamental, afondando na idea de que se trata dun recurso que necesita protección.}

^{Nesta iniciativa, que tivo como colofón unha ‘performance’, participaron alumnos de 1º curso da ESO do IES de Valga e usuarios do CODI, que previamente participaron en varias sesións informativas de carácter ambiental impartidas por unha técnica experta na materia e nun obradoiro de dramatización e teatro para ofrecerlles as ferramentas que os capacitasen para a creación da acción artística.}

^{A duración total do proceso foi de máis de seis horas, distribuídas en tres sesións. Os estudantes e usuarios do CODI foron protagonistas en todos os pasos do proceso, elixindo os contidos e temáticas a tratar e tamén aspectos da posta en escena final, que tivo lugar onte.}