- Os chefs Fran Jamardo, Coque Fariña e Rocío Garrido prepararon catro receitas, todas servidas en vaso

- A segunda edición deste programa incluíu catro sesións de cociña durante todo o mes de abril

^{Valga, 26 de abril de 2023.}

^{A Aula Gastronómica pechou onte a súa segunda edición cunha xornada doce dedicada ás sobremesas na que os chefs de Indo e Vindo Gastronomía explicaron e prepararon catro receitas de doces coa característica de que todos se serviron en vaso, un formato cómodo e resolutivo que se adapta a calquera tipo de torta ou sobremesa.}

^{E, como exemplo, as opcións ofrecidas onte, comezando por un clásico: torta de queixo con froitos vermellos, cunha base de galletas ‘oreo’ e senllas capas de crema pasteleira e de marmelada feita cos froitos. O cociñeiro Fran Jamardo ofreceu, ademais, unha segunda versión desta mesma sobremesa, cunha presentación que simulaba unha planta nunha maceta. É o que no argot gastronómico se coñece como ‘trampantojo’.}

^{Unha alternativa máis lixeira foi a crema de aguacate con fresas e nata que elaborou Coque Fariña e que tamén tiña como ingredientes galletas para facer a base, fresas caramelizadas, leite condensada, mel, caramelo líquido e nata montada.}

^{Nesta sesión de repostería tamén houbo referencias á cociña internacional da man dun Bannoffee de plátano, unha sobremesa tradicional británica que preparou Rocío Garrido superpoñendo diferentes capas de galleta triturada, almíbar, doce de leite, plátano troceado e pasado pola sartén, xelatina de chocolate e nata infusionada con licor de avelá.}

^{Fronte a esta elaboración máis contundente, a xornada pechouse cun doce refrescante e lixeiro e que non precisa cocción ningunha: un semifrío de limón no que se combinaron unha crema de limón (feita a base de queixo, nata, leite condensada e zume de limón) con galletas tipo ‘María’.}

^{Foron un total de catro os obradoiros culinarios que se desenvolveron na Casa da Cultura durante este mes de abril (petiscos creativos, cociña saudable, cociña internacional e este último de sobremesas), en todos eles co aforo completo.}