- Melloraranse o saneamento, abastecemento e alumeado e reporanse tamén as beirarrúas

- O proxecto, no que se invisten 225.437 euros, finánciase a través do Plan Concellos da Deputación

^{Valga, 2 de marzo de 2023.}

^{O Concello está a executar obras de mellora e renovación dos servizos na marxe esquerda da Avenida da Coruña (N-550), en Pontevalga, nun tramo de aproximadamente 500 metros dende a Casa do Concello ata pasar o edificio Bella Valga. O proxecto conta cun orzamento de 225.437 euros, que se financian a través do Plan Concellos 2022.}

^{Con esta actuación preténdese dotar esta zona urbana de todos os servizos necesarios así como resolver as deficiencias que presentan os xa existentes debido, entre outras circunstancias, á antigüidade das canalizacións que causan reiterados problemas.}

^{As obras, que foron adxudicadas á empresa Covsa, darán solución a estas deficiencias mediante a renovación das vellas canalizacións, pero ademais engadiranse aquelas que actualmente non existen para dotar á zona dun servizo axeitado e de maior calidade.}

^{Os traballos consisten no levantado das beirarrúas e retirada das canalizacións existentes para a súa substitución por novas tubaxes de saneamento, abastecemento, recollida de augas pluviais e alumeado público. Tamén se dotará á zona de canalizacións de electricidade e fibra, eliminándose o cableado aéreo en todo o tramo. Finalmente, reporanse as beirarrúas en formigón coloreado.}

^{Durante o período de execución das obras produciranse restricións de tráfico na estrada N-550, con cortes intermitentes no carril esquerdo. A circulación está sendo regulada mediante semáforos.}