- Formaranse nos sectores con maior demanda de traballadores na zona, entre eles fabricación mecánica, o agroforestal ou o turismo

- O alcalde e a concelleira de Emprego participaron esta mañá na presentación do proxecto

^{Valga, 28 de decembro de 2022.}

^{Valga participará durante os vindeiros 12 meses nun Programa Integrado de Emprego subvencionado pola Xunta de Galicia, xunto cos concellos de Dodro, Rianxo, Padrón, Rois e Pontecesures, un proxecto que beneficiará a 100 persoas desempregadas das seis localidades co obxectivo de mellorar a súa empregabilidade a través da realización dun conxunto de accións para facilitar a súa inserción no mercado laboral.}

^{O programa foi presentado esta mañá nun acto coa participación de alcaldes e representantes municipais dos seis concellos, entre eles, José María Bello Maneiro, ao que acompañou a concelleira de Emprego, Carmen Gómez. O rexedor sinalou que a importancia deste proxecto para continuar favorecendo a “ocupabilidade das persoas que se atopan sen emprego” a través da formación.}

^{Os participantes no Programa Integrado de Emprego deben estar inscritos como demandantes no Servizo Público de Emprego de Galicia co código 930. Percibirán unha bolsa de 7 euros ao día pola asistencia as diferentes accións que se desenvolverán no marco deste proxecto, entre elas orientación e asesoramento laboral individualizado, talleres de coaching e intelixencia emocional, obradoiros de mobilidade laboral, habilidades sociais e entrevistas, accións de intermediación con empresas, fomento do autoemprego e do emprendemento e formación para o emprego nos sectores que xeran máis traballo e que presentan maiores potencialidades de emprendemento no ámbito territorial de actuación. Estes sectores son: fabricación mecánica, agrario-forestal, loxística, hostalería e turismo, industrias alimentarias, téxtil e servizos comunitarios. O programa tamén ofrece a posibilidade de realizar prácticas profesionais non laborais en entidades e empresas da comarca.}

^{Ofrécense, deste xeito, diferentes alternativas para a inserción laboral das persoas con maiores dificultades para incorporarse ao mercado de traballo, baixo un enfoque personalizado e adaptado ás necesidades de cada beneficiario, ao mesmo tempo que se implica ao tecido empresarial do territorio, xerando unha rede de empresas colaboradoras, e se fomenta o autoemprego e o emprendemento a través dos recursos e produtos locais.}