- A asociación Amigos do Belén xa está inmersa nas tarefas para recrear os acontecementos máis importantes do ano

- O nacemento está declarado de Interese Turístico de Galicia

^{Valga, 18 de outubro de 2022.}

^{O Belén Artesanal 2022/2023 está en marcha. A asociación Amigos do Belén xa está mans á obra para remodelalo e volver a sorprender aos milleiros de visitantes que cada Nadal se achegan a Campaña para contemplar un nacemento único, declarado de Interese Turístico de Galicia.}

^{O pasado xoves, día 13, foi a xornada na que se iniciaron os traballos, coa desmontaxe da composición anterior e retirada das figuras, edificacións e estruturas que formaron parte dela. Ese foi o punto de arranque e, nestes últimos días, os membros de Amigos do Belén xa teñen e as mans e a mente postas nas escenas que formarán parte da nova edición do Belén, que como é habitual fará un repaso polos acontecementos máis importantes de todo o ano a nivel local, nacional e internacional e en ámbitos tan dispares coma a política, a economía, os deportes e a vida social, entre outros.}

^{A erupción do volcán Cumbre Vieja, a pandemia ou os Xogos Olímpicos, que vertebraron a última edición do Belén, deixarán espazo a novos temas que coparon minutos de informativos, páxinas de xornais e revistas nos derradeiros meses. O proceso desenvólvese co equipo de traballo dividido en diferentes seccións. Mentres un grupo se centra en reparar mecanismos das pezas con movemento que están avariados e en arranxar figuras danadas, outros dan forma aos novos personaxes e deseñan a súa roupa e complementos coas novas máquinas de coser adquiridas coa última subvención da Axencia Turismo de Galicia, da Xunta. Outra parte do grupo está dedicado a crear novos edificios e construcións empregando materiais coma madeira ou pedra.}

^{A medida que as novas pezas estean rematadas, dará comezo o proceso de montaxe, que se fará progresivamente para que o día 4 de decembro todo estea listo para a inauguración.}

^{Ademais, nesta edición o Belén estrea tamén nova composición exterior. A zona frontal do local foi acondicionada e redecorada a través do concurso Embelecer Valga, no que gañou o primeiro premio. Os traballos realizados polo colectivo Amigos do Belén, con materiais aportados polo Concello, incluíron a restauración do peche de madeira, limpeza e a decoración e ornamentación do espazo con plantas, flores e figuras feitas a man con materiais reciclados.}

^{Visitas estivais}

^{Aínda que o Nadal é a época por excelencia para visitalo, o Belén Artesanal en Movemento pode verse durante todo o ano. A pasada edición mantívose ata as primeiras semanas de outubro e durante o verán foron moitas as visitas de grupos e excursionistas que recibiu o nacemento, chegados dende Madrid, Toledo, Córdoba e outras moitas localidades de Galicia e de España. “Tivemos xente todos os meses, foi algo continuo”, destaca a presidenta de Amigos do Belén, Mari Carmen Castiñeiras. A última visita, tivo lugar na primeira semana de outubro, por parte dun grupo procedente de Zaragoza.}