- O alcalde, José María Bello Maneiro, e a concelleira Begoña Piñeiro inauguraron onte a mostra xunto á pintora

- “O Camiño das estrelas” permancerá na sala de exposicións do Auditorio ata finais de outubro

^{Valga, 7 de outubro de 2022.}

^{O Auditorio Municipal recupera a súa actividade expositiva tralo parón do verán e faino da man da artista Mª José Rodríguez, que trae a Valga a mostra “O Camiño das estrelas”, unha colección de pinturas vencelladas coa temática do Camiño de Santiago, aproveitando o Ano Santo 2021-2022. Aínda que a estrea da exposición, incluso foi anterior, no ano 2020 na Casa de Galicia en Madrid.}

^{Adquiriu despois un carácter itinerante, pasando por Vila de Cruces, Friol, Guitiriz ou Melide, entre outras localidades, e recala agora no Auditorio, onde onte o alcalde, José María Bello Maneiro, e a concelleira Begoña Piñeiro recibiron a artista con motivo do acto de inauguración.}

^{“Quero amosar o meu amor polo Camiño e pola cultura que se desenvolve arredor seu grazas á chegada de xente de todos os currunchos do mundo, o que propicia un gran intercambio cultural", explicou Mª José Rodríguez. Panorámicas de Santiago, coa Catedral como elemento central, e doutras cidades e vilas galegas integran esta exposición. Tamén hai espazo para elementos patrimoniais e etnográficos coma os hórreos ou para tradicións coma a malla do trigo. Para completar a mostra, ofrécese un percorrido por distintas cidades españolas a través de cadros nos que se combinan diferentes técnicas: algúns están feitos con máquina de coser, outros incorporando teas, partes de caixas de froitas e latas de bebidas, coma un chamamento a prol da reciclaxe.}

^{María José Rodríguez defínese como unha artista multidisciplinar, abarcando dende a pintura ata a artesanía, modelado, escultura e incluso a costura. Nada na Coruña, a profesión do seu pai ferroviario levouna de nena a residir en Ponferrada e, posteriormente, a trasladarse a Vilagarcía, onde está afincada dende hai anos. Ademais, ten tamén relación con Valga, xa que casou cun veciño de Xanza. Este é a segunda vez que amosa as súas obras na nosa vila, posto que hai uns anos xa realizara unha exposición na Casa do Concello con motivo da Festa da Anguía e Mostra da Caña do País.}