- O alcalde acudiu a felicitala e agasallouna cunha placa conmemorativa do seu 100 aniversario

- María, que tivo 6 fillos, 11 netos e 9 bisnetos, foi pandereteira durante anos

^{Valga, 20 de setembro de 2022.}

^{María Tarrío Campaña, veciña de Moldes (Cordeiro), únese ao club dos centenarios de Valga. Hoxe celebra o seu 100 aniversario e con este motivo recibiu a visita do alcalde, José María Bello Maneiro, e a concelleira de Benestar Social, Begoña Piñeiro, que a felicitaron nesta xornada tan especial tanto para ela como para a súa familia.}

^{Agasallárona cunha placa conmemorativa en recordo deste día, coa lenda “O Concello de Valga a María Tarrío Campaña no día en que cumpre os 100 anos”, e tamén cun ramo de flores e unha torta na que apagou as candeas co número 100.}

^{María Tarrío naceu no seo dunha familia humilde de Moldes, sendo a mediana de sete irmáns. Como a maioría de mulleres daquela época, dedicou a súa vida a coser polas casas, ao coidado do fogar e ás tarefas do campo.}

^{Ademais, quedáballe tempo para participar en seráns, ruadas e xuntanzas que antano eran habituais nas aldeas e nas que non podían faltar as gaitas e coplas. María era pandereteira e co paso dos anos foi transmitindo boa parte do seu saber a recolledores de cantares e estudosos da pandeireta.}

^{Foi integrante do grupo de Pandereteiras de Moldes e asidua participante dos Encontros Interxeracionais que adoitaba organizar o Concello para dar a coñecer entre os cativos de Valga como se desenvolvían antigamente as tarefas agrarias, en concreto o proceso de cultivo do trigo.}

^{A día de hoxe, aínda que a mobilidade a limita, a nova centenaria segue realizando algunhas das súas actividades favoritas, como xogar á baralla todos os domingos. Ademais, conta coa compaña dos seus 6 fillos, 11 netos e 9 bisnetos.}

^{María Tarrío é a cuarta persoa máis lonxeva de Valga, despois de Hipólito Cerqueiras, tamén de Moldes, e Regina Grela, de Campaña, ambos con 102 anos, e de Josefina Rodríguez, do Carballiño, que recentemente cumpriu 101.}