- A Consellería do Medio Rural, a través dos fondos Feader, aporta financiación para este proxecto

- Preténdese frear o seu deterioro e resaltar a súa importancia histórica e cultural

^{Valga, 31 de agosto de 2022.}

^{O Concello prepara unha intervención de posta en valor duns dos elementos patrimoniais máis senlleiros vencellados ao río Ulla: as telleiras. Dúas destas antigas construcións dedicadas ao traballo do barro e á produción de cerámica, as telleiras de Padín e Roeiro, situadas en Vilar (Cordeiro), serán sometidas a unha actuación para frear o seu deterioro grazas a unha subvención da Consellería do medio rural, a través do Fondo Europeo Agrícola de Desenvolvemento Rural (Feader).}

^{O proxecto inclúe a roza e limpeza do entorno das telleiras, coa retirada de maleza e escombro, a mellora do camiño de acceso, limpeza en seco das estruturas en pé, reparación das zonas en mal estado e con risco de derrubamento, delimitación da zona cunha varanda rústica de madeira e a colocación de dous paneis informativos. Deste xeito preténdese frear o deterioro das edificacións e darlle a importancia cultural, patrimonial, histórica e ambiental que teñen.}

^{Estas dúas telleiras foron no seu tempo unhas das construcións máis singulares da contorna do río Ulla, cunha edificación en forma circular e, asociados ao forno, outras construcións para o traballo dos telleiros e un tanque ou pequena canle que permitía o atraque das embarcacións para o transporte de barro e tella.}

^{A telleira de Roeiro foi abandonada en 1945, construíndose outra a poucos metros debido ás dificultades que presentaba para o cocido da tella na cámara circular e a que o tanque só se podía utilizar en preamar.}

^{A telleira de Padín, pola súa parte, foi a última da zona en construírse, en 1942, e mantívose en activo ata 1960.}