- Os produtos distribuiranse entre as familias de Valga en situación de vulnerabilidade

- As doazóns dos participantes nas actividades aumentaron en case 100 quilos con respecto á pasada edició

^{Valga, 31 de agosto de 2022.}

^{As actividades organizadas no marco do “Agosto Gastronómico”, que o Concello puxo en marcha durante este último mes como parte da programación da XXXII Festa da Anguía e Mostra da Caña do País, conseguiron xuntar 252 quilos de alimentos para axudar ás familias en situación de vulnerabilidade do noso municipio.}

^{Os cociñeiros de Indo e Vindo Gastronomía, Fran Jamardo, Coque Fariña e Rocío Garrido, fixeron esta mañá entrega dos alimentos ao Concello nun acto que tivo lugar no Centro de Interpretación da Caña do País e ao que asistiron a segunda tenente de alcalde, Carmen Gómez, o concelleiro de Cultura, Pedro Calvo, e unha traballadora do departamento de Servizos Sociais.}

^{Os produtos non perecedoiros foron aportados polos participantes en cada unha das actividades, que eran gratuítas pero tiñan esta parte benéfica. Os catro showcookings de receitas con anguía, pratos con caña e cócteles contaron cuns 120 asistentes, aos que hai que sumar a vintena de nenos que acudiron ao obradoiro de cociña.}

^{A lista de alimentos aportados inclúe 70 quilos de pasta, 44 de arroz, 42 de legumes, 24 de conservas, 17 de azucre, 11 bricks de leite, 10 quilos de fariña, 9 de galletas e cereais, 5 de salsa de tomate, 8 botellas de aceite, 2 paquetes de sal e diferentes produtos de hixiene persoal, entre outras doazóns.}

^{Todos estes produtos serán agora clasificados e almacenados polo departamento municipal de Servizos Sociais para o seu reparto entre as familias sen recursos, en situación ou risco de exclusión.}

^{Os chefs de Indo e Vindo Gastronomía destacaron o incremento de produtos recadados con respecto ao ano pasado, cando foran 175 quilos. “Xuntamos case 100 quilos máis”, un feito que achacan, por unha parte, “á colaboración e solidariedade da xente”, pero tamén ao incremento no número de asistentes nas actividades, posto que en 2021 aínda había restricións pola pandemia.}

^{En representación do Concello, o concelleiro de Cultura agradeceu a implicación de Indo e Vindo e tamén dos veciños e visitantes que asistiron ás diferentes actividades, xa que grazas a eles esta iniciativa solidaria “foi un éxito e permitirá axudar a moitas familias de Valga que o necesitan”.}