- A vicealcaldesa e o concelleiro de Deportes e Xuventude estonios están a coñecer o municipio e mañá participarán nos actos festivos

- Esta visita reforza as relacións de irmandade que ambas localidades manteñen dende hai case unha década

^{Valga, 26 de agosto de 2022.}

^{Unha delegación da localidade de Valga, en Estonia, está a visitar o noso concello nestes días, convidados polo Concello con motivo da XXXII Festa da Anguía e Mostra da Caña do País.}

^{A vicealcaldesa, Maarja Mägi, e o concelleiro delegado da área de Deportes e Xuventude, Tõnu Vahtra, son os representantes estonios que onte chegaron a Valga co obxectivo de seguir fortalecendo as relacións que ambas localidades homónimas manteñen dende hai case unha década en ámbitos coma o educativo, cultural ou social, uns lazos que se viron refrendados en 2017 coa sinatura do protocolo de irmandamento.}

^{Os visitantes chegaron onte á noite a Santiago, onde os agardaban o concelleiro de Cultura, Pedro Calvo, e o técnico municipal Santiago Chenlo. Durante a xornada de hoxe están a coñecer Valga, os seus equipamentos e dotacións públicos e os seus espazos de interese cultural, patrimonial e natural, acompañados tamén polo alcalde, José María Bello Maneiro, e a segunda tenente de alcalde, Carmen Gómez. Pola mañá achegáronse a centros educativos e formativas coma o IES de Valga, a Escola Infantil Municipal e o CODI, onde foron agasallados cun cinseiro e un alambique feitos con barro polos propios usuarios.}

^{Tamén tiveron ocasión de coñecer a Casa do Concello, as súas dependencias e o traballo que desenvolve o persoal municipal. O alcaldes entregoulles, como regalo institucional, unha figura co mapa de Valga e as súas cinco parroquias e o pin e a bandeira do municipio, que nestes días ondea xunto á de Estonia na Casa Consistorial e no Auditorio Municipal, edificio ao que tamén se achegaron. Alí uneuse á expedición a concelleira de Turismo, Malena Isorna.}

^{O percorrido por Valga continou pola a área fluvial de Vilarello, novo embarcadoiro de Santa Cristina e outros dos espazos que coñeceron Maarja Mägi e Tõnu Vahtra foron a Mina Mercedes e Porto Piñeiro, explicándolles os representantes municipais o proxecto de recuperación que o Concello pretende desenvolver. A parada no Belén Artesanal, un dos recursos turísticos máis relevantes de Valga, era tamén obrigada.}

^{Pola tarde continuarán descubrindo a cultura valguesa con visitas ás fervezas de Parafita, ao Museo da Historia e ao Centro de Interpretación da Caña do País, onde poderán seguir a cata final do Concurso da Caña.}

^{Mañá participarán nos actos da Festa da Anguía e Mostra da Caña do País e o domingo emprenderán o regreso cara Estonia, pero os contactos entre ambas localidades continuarán en breve, pois en setembro está prevista a visita de tres profesores do instituto de Valga-Estonia para desenvolver actividades educativas e culturais co noso IES.}