- Vinte nenos de 4 a 12 anos asisten ás actividades de conciliación gratuítas organizadas polo Concello

- Nestas primeiras xornadas realizaron xogos de presentación, crearon instrumentos e percorreron o Camiño Portugués

^{Valga, 5 de agosto de 2022.}

^{Co cambio de mes, a Escola de Verán trocou tamén de participantes, recibindo a unha nova quenda de rapaces que asistirán ás actividades gratuítas organizadas polo Concello ata o vindeiro día 26. Son unha vintena de nenos de entre 4 e 12 anos de idade os que se incorporaron a comezos desta semana á Escola, coa que se trata de facilitar a conciliación entre a vida laboral e familiar durante o período de vacacións escolares.}

^{A semana comezou cunha serie de xogos de presentación para que os nenos se coñeceran, tamén fixeron as súas propias pulseiras e colares, xogaron ás sillas musicais, realizaron unha xincana deportiva e crearon instrumentos con material reciclado. Por exemplo, unhas tarrañolas feitas con cartón e tapóns que os cativos decoraron con pinturas.}

^{Ademais, adicaron unha das xornadas ao Camiño de Santiago, converténdose en auténticos peregrinos para percorrer un tramo da ruta portuguesa ao seu paso por Valga, entre O Pino e San Miguel.}

^{No que queda de mes, participarán en moitas máis actividades sobre igualdade ou reciclaxe, e en obradoiros coma o que está previsto para o día 11: “Fai clic ao teu bocata”, para promocionar o consumo de conservas de pescado e marisco entre os cativos. Esta actividade tamén está aberta á asistencia de nenos que non participen na Escola de Verán. As inscricións poden realizarse no Concello.}