- Haberá concursos e obradoiros para enxalzarar os dous produtos protagonistas

- A Festa da Anguía recupera este ano as súas actividades centrais: a degustación e a verbena no Parque Irmáns Dios Mosquera

^{Valga, 15 de xullo de 2022.}

^{Achégase o mes de agosto e o Concello está a ultimar a programación da gran festa do ano en Valga: a XXXII Festa da Anguía e Mostra da Caña do País. Esta mañá presentáronse no Centro de Interpretación da Caña as actividades gastronómicas que se desenvolverán no marco do “Agosto Gastronómiico”, que acada a súa segunda edición tralo éxito da experiencia de 2021.}

^{Showcookings e obradoiros ofrecerán ideas para sacar o máximo partido culinario aos dous produtos protagonistas da festa (a anguía e a augardente), e tamén haberá concursos dirixidos á mocidade e ao público en xeral. Todo baixo o paraugas do equipo de Indo e Vindo Gastronomía, cos chefs Rocío Garrido, Fran Jamardo e Coque Fariña, que participaron na presentación xunto ao alcalde, José María Bello Maneiro, e o concelleiro de Cultura, Pedro Calvo.}

^{As actividades darán comezo o día 27 de xullo, co primeiro showcooking de título “Destapa a anguía”, no que se cociñarán en directo tapas creativas realizadas con este peixe. Aínda que está aberto á participación de todo tipo de público, esta proposta pensouse especialmente para os hostaleiros do municipio, para que poidan captar novas ideas de cara á súa participación na Ruta de Tapas que cada ano se organiza tamén con motivo da festa.}

^{Haberá outras tres demostracións os días 17, 21 e 24 de agosto: “A caña no prato”, na que se cociñarán catro receitas elaboradas con caña do país; “Moito máis que caña”, coa preparación de cócteles con augardente; e “Universo anguía”, na que se elaborarán catro pratos que terán como ingrediente principal a anguía. Os showcookings, que se desenvolverán no Centro de Interpretación da Caña, inclúen degustación por parte dos asistentes e maridaxe.}

^{O “Agosto Gastronómico” ten tamén parte da súa programación orientada aos nenos e aos mozos. O día 3 de agosto terá lugar no Parque Irmáns Dios Mosquera un obradoiro de cociña para nenos de entre 5 e 12 anos, que elaborarán dous pratos: un salgado, que terá a anguía entre os seus ingredientes, e un doce.}

^{Entre o 9 e o 11 de agosto terá lugar o concurso Anguía Chef, dirixido a mozos de entre 13 e 18 anos. Durante estas dúas xornadas, catro equipos integrados por catro rapaces competirán por ser os mellores cociñando anguía. Deberán superar unha primeira eliminatoria para clasificarse para a gran final do día 18 e haberá premios para os gañadores.}

^{Todas estas actividades son gratuítas, pero teñen un carácter solidario. Os inscritos deberán aportar un quilo de alimentos non perecedoiros que, posteriormente, se entregarán ao departamento de Servizos Sociais para a súa distribución entre as familias sen recursos.}

^{As inscricións realizaranse cubrindo as follas de solicitude e presentándoas no Concello ou a través do correo electrónico Este enderezo de correo está a ser protexido dos robots de correo lixo. Precisa activar o JavaScript para velo. no prazo establecido para cada actividade. As solicitudes atenderanse por orde de entrada.}

^{Concursos de fotografías e de receitas}

^{As actividades do “Agosto Gastronómico” complétase con dous concursos de fotografías e receitas. Ao primeiro poden presentarse imaxes relacionadas coa anguía, a caña do país e o Camiño de Santiago ao seu paso por Valga e desenvolverase a través das redes sociais Facebook e Instagram. Concederanse tres premios consistentes en tres lotes de produtos galegos valorados en 100 euros cada un.}

^{En canto ao concurso de receitas de anguía e caña, as persoas interesadas en participar poderán enviar a través de correo electrónico as súas propostas culinarias elaboradas con estes produtos, acompañadas dunha fotografía e unha explicación sobre a súa preparación. O premio para o gañador será tamén un lote de produtos valorado en 100 euros.}

^{O concelleiro de Cultura lembrou que estas actividades organizáronse por vez primeira o ano pasado coa intención de “dar un xiro á Festa da Anguía”. “Foi unha proba de lume”, engadiu, “e, con todo en contra pola problemática da pandemia, o éxito foi abrumador, polo que este ano esperamos repetilo”. Na mesma liña, o alcalde animou a “valgueses e visitantes a que participen nestas propostas gastronómicas nas que contaremos con tres artistas da cociña que nos deleitarán co seu traballo”.}

^{Sobre o contido das diferentes actividades, os chefs avanzaron que “seguiremos na liña iniciada o ano pasado, de innovar e elaborar receitas diferentes e aportando ideas” que os asistentes poidan reproducir nos seus fogares, xa que “hai moitísimas maneiras de preparar a anguía” e de integrar a caña na cociña. Destacaron, así mesmo, que todos os pratos que se degustarán nos showcookings acompañaranse con viño e licores de Valga seguir dando visibilidade ás empresas locais.}

^{XXXII Festa da Anguía e Mostra da Caña do País}

^{O Concelleiro de Cultura avanzou, en canto á celebración da Festa da Anguía e Mostra da Caña do País na última fin de semana de agosto, que despois de dous anos de restricións volverán as actividades máis emblemáticas, a degustación de tapas de anguía e cócteles con caña no Parque Irmáns Dios Mosquera e a verbena. Ademais, engadiu, haberá outras moitas actividades culturais, lúdicas e tamén deportivas para completar a programación.}