- As concelleiras Carmen Gómez, Begoña Piñeiro e Malena Isorna acompañaron ao rexedor na visita

- Agasallárono un ramo de flores e unha torta e brindaron coa familia

^{Valga, 5 de xullo de 2022.}

^{O alcalde, José María Bello Maneiro, felicitou esta mañá a Hipólito Cerqueiras Pardal no día do seu 102 aniversario.}

^{O rexedor, acompañado polas concelleiras Carmen Gómez, Begoña Piñeiro e Malena Isorna, visitou ao centenario no seu domicilio, en Moldes (Cordeiro) para transmitirlle os parabéns en nome de todos os veciños de Valga. Agasallárono cun ramo de flores, unha torta e doces cos que festexar unha data tan especial rodeado polos seus achegados.}

^{O centenario, que é o veciño máis lonxevo de Valga, apagou as candeas co número 102 e brindou cos representantes municipais e os familiares que o acompañaban. Parte da familia reunirase este mediodía nunha comida na honra de Hipólito, que pola tarde tamén recibirá a visita de máis parentes que non queren deixar pasar o día sen felicitalo.}

^{Hipólito Cerqueiras tivo seis fillos –un deles faleceu de mozo– e suma 25 netos, 16 bisnetos e 5 tataranetos. “Se temos que xuntarnos todos non nos chega o pavillón de Cordeiro”, bromeaba esta mañá unha das súas fillas.}