- No instituto impártense charlas ao alumnado dende 1º da ESO ata FP Básica

- As accións trasladaranse a partir de abril aos colexios de Baño e Ferro Couselo

^{Valga, 9 de marzo de 2018.}

^{O Plan de Prevención das Drogodependencias e outras condutas adictivas que o Concello de Valga comparte con Dodro, Padrón e Rois comezou a desenvolver as actividades programadas nos centros educativos de Valga, en concreto no IES onde se imparten sesións co alumnado dende 1º curso da ESO ata FP Básica.}

^{Son catro charlas por aula nas que se ofrece información sobre as drogas, tanto legais como ilegais, e se advirte sobre os seus efectos na saúde e a nivel social. Ademais, axudase aos mozos a adquirir habilidades para enfrentarse á presión grupal, de maneira que conten con argumentos para rexeitar o consumo de substancias nocivas.}

^{Tamén se abordan co alumnado as adiccións relacionadas coas novas tecnoloxías e o abuso das redes sociais, advertíndo sobre os riscos que conleva un mal uso de internet. Nalgunhas destas actividades estase a contar coa colaboración da Garda Civil.}

^{A partir do mes de abril o Plan de Prevención das Drogodependencias comezará a actuar nos colexios de Baño e Cordeiro co alumnado de 5º e 6º cursos de Educación Primaria. Impartiranse charlas centradas nos hábitos de vida e alternativas de ocio saudables.}

^{Por outra parte, estanse a organizar tamén actividades para adultos. Está fixada para o vindeiro 13 de abril unha charla para pais sobre os riscos das novas tecnoloxías e internet. Aínda que terá lugar no Auditorio de Padrón, diríxese a veciños dos catro municipios que promoven o programa.}

^{O Plan prevención das drogodependencias e outras condutas adictivas dos concellos de Valga, Padrón, Dodro e Rois, constituído en servizo de carácter supramunicipal, está en funcionamento dende o ano 2013. Dous profesionais con formación específica en drogodependencias traballan en cooperación cun equipo multidisciplinar integrado por educadores, traballadores sociais e administrativos dos catro concellos agrupados coa finalidade de atender e canalizar as demandas de información, asesoramento, formación e intervención en relación coas drogas e outras adiccións. A Xunta de Galicia aprobou unha subvención de 46.259,49 euros para as actividades deste programa, o que supón o 95% da financiación necesaria.}