- A comezos de abril acadou a medalla de ouro no Campionato nacional de Xóvenes Promesas en categoría cadete

- Iniciouse neste deporte aos 10 anos e agora compite co Club Náutico de Pontecesures

^{Valga, 13 de abril de 2022.}

^{A piragüista valguesa Nerea Novo Romero vén de proclamarse campioa de España de C1 na categoría cadete A na distancia de 5.000 metros no Campionato de Xóvenes Promesas celebrado a comezos de abril en Sevilla, no que se deron cita máis de 1.000 participantes de 106 clubes de todo o país.}

^{A moza de Outeiro (Cordeiro) foi recibida esta mañá no Concello polo alcalde, José María Bello Maneiro, e pola concelleira Carmen Gómez, que a felicitaron por este logro deportivo, que non é o primeiro. Hai un ano, cando era cadete B, xa acadara a medalla de prata e, no verán, no Campionato de España de Sprint celebrado en Asturias, logrou o primeiro posto en 500 metros e foi tamén campioa nacional en C4.}

^{Sobre estes logros, que sitúan o nome de Valga no máis alto do piragüismo amateur, Nerea Novo conversou cos representantes do goberno municipal, que a animaron a “seguir adestrando con ánimo nos bos momentos coma este e, igualmente, cando as cousas non saian tan ben”.}

^{Aos seus 15 anos, Nerea leva xa cinco practicando piragüismo. “Empecei en Catoira con miña prima, que me animou a probar” e, aínda que fixo unha breve parada para practicar fútbol, regresou despois á canoa enrolada no Club Náutico de Pontecesures, no que continúa na actualidade.}

^{Nerea compaxina o piragüismo cos seus estudos. “É complicado, pero Intento adestrar todos os días arredor de dúas horas e media” coa única excepción do domingo. Nestas festas de Semana Santa tamén ten tarefa xa pensando no seu próximo reto, a Copa de España cadete que se disputa a mediados de maio en Verducido (Pontevedra).}

^{“Este é un deporte duro”, di a moza valguesa sobre o piragüismo. “No inverno fai frío, aínda que este ano tivemos a sorte de que non houbo riada, pero cando un se engancha lévase ben”. Conta co apoio de toda a súa familia e achegados, que “están moi contentos e orgullosos despois de todo o traballo feito”.}