- Veciña de Pontecesures, pero criada en Valga, comezou en 2003 a súa faceta artística

- A mostra foi inaugurada onte polo alcalde, José María Bello Maneiro, e pode verse durante todo o mes de abril

^{Valga, 5 de xaneiro de 2022.}

^{Traballos con vidro e tellas ocupan durante este mes de abril a sala de exposicións do Auditorio Municipal da man de Sonia Carbia Torres, nada en Pontecesures, onde tamén reside agora, pero “criada en Valga a partir dos 3 anos e ata os 28”, conta.}

^{A súa mostra “Entre tellas e vidros” foi inaugurada onte polo alcalde, José María Bello Maneiro, e as concelleiras Begoña Piñeiro e Malena Isorna, nun acto no que tamén participaron integrantes da asociación de Mulleres Rurais Albor, da que forma parte a artista.}

^{As obras que expón Sonia Carbia teñen o seu xermolo no ano 2003 cando realizou o seu primeiro curso de tellas. “Dende entón e ata 2018 facíaas esporadicamente, cando tiña encargas”. Ata que Rosa Crespo, a presidenta da asociación Albor, se puxo en contacto con ela “para propoñerme dar un curso, que aínda continúa impartíndose hoxe en día”.}

^{Na exposición pode verse a evolución nos seus traballos, dende as primeiras tellas que realizou ata as máis recentes, máis traballadas e con numerosos detalles que as fan únicas. Representan fachadas de vivendas, entre elas a súa propia e outras tamén personalizadas que lle encargan. Tamén replica outro tipo de inmobles, coma faros.}

^{No referido ao vidro, a súa relación con este material comezou máis tarde, arredor de 2007. “En 2019 tamén comecei a dar un curso na asociación Albor e dende entón xa non paramos con el”. Empregando a técnica Tiffany realiza todo tipo de creacións e obxectos decorativos: lámpadas espellos, xoieiros, flores, pezas de bisutería... “Con vidro pódese facer practicamente de todo, agora estou traballando en dúas vidreiras para a miña casa. Sempre vou collendo novas ideas e aprendendo cousas a través das redes sociais e de internet, porque estas técnicas teñen moitísima aceptación noutros países. En España aínda non tanto”, explica.}

^{Ademais, conta coa colaboración do seu home para rematar os seus traballos, xa que lle axuda cos enganches para as tellas, as bases para as pezas de vidro e outros detalles.}

^{“Todo o que forma parte da exposición é feito a man”, coa única excepción dun farol que é restaurado. Moitas das pezas xa están vendidas, xa que Sonia conta cunha páxina de Facebook (Vitralhesa) e un perfil en Instagram (@carbiatorres) para promocionar e divulgar o seu traballo.}