- O alcalde e o concelleiro de Cultura recibiron no Concello ao autor da obra, Miguel Ángel Martínez Coello

- A publicación inclúe 800 ilustacións, das que 56 son orixinais feitas polo autor, e documentación de diferentes países do mundo

^{Valga, 4 de abril de 2022.}

^{Valga acollerá a presentación oficial dunha nova publicación sobre a figura da Bella Otero. Trátase do libro “A Bela Otero”, de Miguel Ángel Martínez Coello, que mantivo unha xuntanza no Concello co alcalde, José María Bello Maneiro, o concelleiro de Cultura, Pedro Calvo, e o técnico responsable do Museo da Historia, Santiago Chenlo, para pechar algúns dos detalles do acto, previsto para finais do mes de xuño.}

^{A obra, editada pola Fundación Martínez Coello, foi presentada a finais do mes de febreiro na Facultade de Ciencias Emrpesariais e Turismo do Campus de Ourense, pertencente á Universidade de Vigo. Tratouse dun acto de carácter académico, pero o autor quere que a presentación formal do libro se celebre en Valga, vila natal de Carolina Otero, á que cualifica coma “a muller máis impresionante do mundo na primeira década do século XX, xa que cada vez que movía ficha era noticia en toda a prensa mundial”.}

^{“A Bela Otero” é froito de más dunha década de traballo en busca de documentación. O resultado é un libro con 56 capítulos, 800 ilustracións (entre elas 56 orixinais feitas polo propio autor) e documentos de países coma Estados Unidos, Francia ou Australia, entre outros. En total, 360 páxinas nas que se aborda a vida de traxectoria da bailarina da Belle Époque, á que Martínez Coello quere poñer en valor coma unha muller emprendedora, “coa súa propia personalidade, moi feita á súa maneira e á que non lle importou enfrontarse con nada”.}

^{Na xuntanza desta semana no Concello, Miguel Ángel Martínez estivo acompañado por Celso Pumar, presidente de Aulas de Formación Aberta do Campus de Ourense. O alumnado deste colectivo e do Programa Universitario de Maiores visitará Valga con motivo da presentación do libro para coñecer o Museo da Historia e outros dos recursos culturais, naturais e turísticos cos que conta o municipio.}