- O alcalde e o concelleiro de Cultura mantiveron unha xuntanza con representantes da asociación Heroes de Casal de Eirigo para tratar temas organizativos

- O obxectivo é reformular a programación, sempre partindo da recreación da batalla como acto central

^{Valga, 28 de marzo de 2022.}

^{Valga recuperará neste 2022 as súas principais citas festivas despois de dous anos nos que a pandemia da Covid-19 impediu que apenas houbera celebracións, máis aló de determinadas actividades con control de aforo con motivo da Festa da Anguía e Mostra da Caña do País.}

^{A primeira gran cita festiva post-pandemia será a Recreación da Batalla de Casal de Eirigo, que terá lugar o 28 de maio. O alcalde, José María Bello Maneiro, a tenente alcalde, Carmen Gómez, e o concelleiro de Cultura, Pedro Calvo, mantiveron unha xuntanza con membros da directiva da asociación Heroes de Casal de Eirigo para comezar a perfilar as distintas actividades que poderían formar parte do programa.}

^{Neste encontro déronse os primeiros pasos en cuestións organizativas e expuxéronse as primeiras ideas de iniciativas culturais e lúdicas que poderían desenvolverse. “Despois de dous anos sen celebrarse, o obxectivo é reformular a festa, sempre partindo da recreación da batalla como acto central e sen que falten actuacións musicais e actividades de entretemento para todos os públicos”, explica o concelleiro de Cultura.}

^{Nas próximas semanas terán lugar novas xuntanzas para ir concretando propostas.}

^{A Batalla de Casal de Eirigo tivo lugar no ano 1809 nesta aldea da parroquia de Setecoros, no entorno no que actualmente se erixe a Capela da Saúde, como parte da Guerra da Independencia e enfrontou aos veciños da zona co exército de Napoleón. As alarmas locais demostraron a súa ousadía e valor para, con armas improvisadas e rudimentarias, facer fronte ás preparadas tropas francesas.}