^{- Quince alumnas de 4º de ESO e 1º de Bacharelato demostraron que están igual de capacitadas que os homes}

^{- Sara Iglesias, única alumna do ciclo de Soldadura e Caldeirería: “Os meus profesores dicíanme que me arrepentiría da elección, pero grazas á miña personalidade seguín adiante”}

_{Valga, 7 de marzo de 2018}

_{A igualdade tamén se promove soldando ou, cando menos, así sucedeu hoxe no IES de Valga, que conmemorou o Día Internacional da Muller organizando o I Campionato de Soldadoras no que participaron alumnas de 4º da ESO e 1º de Bacharelato. Promocionar o Ciclo de Soldadura entre as mulleres e denunciar que a excesiva masculinización desta profesión non é cuestión de capacidades, senón que se debe a inercias culturais e de tradición, foron os obxectivos da proba que as estudantes superaron con nota e, sobre todo, con moitas ganas.}

_{Unha preselección inicial deu paso ao concurso no que participaron un total de quince alumnas que tiveron que facer un cordón de soldadura por fío mediante o procedemento MAG. A tarefa estivo supervisada por Jesús López, profesor do Ciclo Medio de Soldadura e Caldeirería e do Ciclo Superior de Construcións Metálicas. Neles só hai unha muller, destaca. “Este é un traballo tradicionalmente de homes e queremos demostrar que as mulleres están igualmente capacitadas”.  O director, Roberto Barral, engade que “a masculinización destes ciclos non se basea en ningunha razón obxectiva. Entre todos temos que cambiar a visión da sociedade, comezando dende o ensino”.}

_{Ainoa Castro proclamouse campiona e Alba Fernández acadou o segundo posto. Recibiron cadanseu diploma e foron gratificadas con 50 e 25 euros respectivamente. Pero o importante non foi a clasificación senón a ensinanza que a experiencia supuxo para as participantes. “Era a primeira vez que soldaba e, despois de facelo, ata me plantexo estudar o ciclo. Debería haber máis mulleres nesta profesión”, sostén Ainoa Castro.}

_{Non sería de estrañar, por tanto, que algunhas das competidoras sigan nun futuro os pasos de Sara Iglesias. Esta veciña de Rois de 19 anos de idade é a única muller no Ciclo Medio de Soldadura e Caldeirería que se imparte no IES de Valga. “E creo que son a única de Galicia”, matiza. Por que soldadura?, é a pregunta que sempre lle fan e, como sucede con case todo, foi por casualidade.}

_{“Cando estaba en 1º ou 2º da ESO a verdade é que non tiña na cabeza ningunha profesión que me interesara especialmente. Un día vin que un amigo tiña un folleto de orientación no que aparecía este ciclo. Eu no o tiña, a min déranme outros de perruquería e química. Chamoume a atención e empecei a ver vídeos en internet, meu pai e meu tío (que é soldador) explicáronme en que consistía esta profesión e, pouco a pouco, funme interesando por ela. Os meus mestres de ESO e Bacharelato non estaban de acordo, dicíanme que non me ía gustar e que me arrepentiría, pero a miña familia e amigos sempre me apoiaron e, grazas a iso e á miña personalidade, seguín adiante”.}

_{Sara non agocha que “ao comezo non estaba segura de que a elección fora a correcta, pero agora si. Gústame máis do que pensaba” e, entre os seus compañeiros, é unha máis. “Trátanme como se fora unha máis. Tiña algo de temor a sentirme excluída do grupo, pero o certo é que todos me fixeron a adaptación moi fácil”.}

_{En base á súa experiencia, Sara Iglesias anima a todas as estudantes a que sexan elas as que elixan o seu futuro, deixando a un lado as tradicións ou estereotipos. “Dígolles que teñan criterio propio e que non se deixen influenciar porque, se lles sae mal, sempre teñen opción de deixalo”.}

Máis fotos do I Campionato de Soldadoras: https://www.facebook.com/media/set/?set=a.224353328113128.1073741966.131969484018180&type=1&l=e4779e5751