- Representantes dos concellos do Ulla-Umia e O Salnés percorreron en barco a vía marítimo-fluvial

- Leuse un manifesto contra a violencia machista e a Caravana Morada ofreceu información e asesoramente neste ámbito

^{Valga, 15 de novembro de 2021.}

^{A concelleira de Igualdade e Benestar Social, Begoña Piñeiro, participou o pasado sábado na ruta “O rural contra a violencia de xénero”, organizada polo Grupo de Desenvolvemento Rural Salnés-Ulla Umia, do que forma parte o Concello de Valga.}

^{Representantes dos distintos concellos destas dúas comarcas percorreron en barco a coñecida como Traslatio, a ruta marítimo-fluvial pola que chegaron os restos do Apóstolo Santiago, e que está considerada como a orixe do Camiño de Santiago. O obxectivo desta iniciativa foi dar visibilidade ás mulleres do rural.}

^{A expedición partiu dende o porto de Vilanova de Arousa e percorreu a Ría de Arousa e o río Ulla ata chegar a Pontecesures, onde se deu lectura a un manifesto en contra da violencia de xénero. Como actividade complementaria, contouse coa Caravana Morada con actividades de información, asesoramento e atención psicolóxica neste ámbito.}

^{“O rural contra a violencia de xénero” foi unha actividade conmemorativa do 25N na que participaron os 24 GDR’s de Galicia e que contou coa colaboración da Axencia Galega de Desenvolvemento Rural, a Secretaria Xeral de Igualdade e a Axencia Turismo de Galicia.}

^{Tendo en conta as características propias de Galicia, un dos obxectivos principais deste evento foi dar visibilidade ás mulleres que residen nas poboacións rurais, un colectivo esencial para o desenvolvemento da nosa sociedade. Ademais, con motivo do Xacobeo 2021-2022, aproveitouse para poñer en valor as diferentes rutas de peregrinación do Camiño de Santiago, entre elas a vía marítimo-fluvial que discorre por Valga.}