- O Concello adheriuse á campaña “Municipios Tolerancia Cero” contra a violencia de xénero e en apoio das vítimas

- Tamén se aprobou unha moción para instar á Xunta a realizar un correcto mantemento da estrada PO-548

^{Valga, 27 de outubro de 2021.}

^{O Pleno municipal aprobou onte á tarde, cos votos favorables do grupo de goberno, a concertación dunha operación de tesourería por importe aproximado de 700.000 euros e por prazo máximo dun ano.}

^{O alcalde, José María Bello Maneiro, e o concelleiro delegado de Facenda, José Ángel Souto, explicaron que esta operación vén motivada polos pagos pendentes de subvencións por parte doutras administracións, nomeadamente a Deputación de Pontevedra e a Xunta. “Entre que se fan as obras e nos dan os cartos pasa un tempo, pero as empresas teñen que cobrar. Nós somos serios e pagamos cando debemos, porque as empresas non son ONGs, teñen que aboar as nóminas”.}

^{José Ángel Souto destacou que o informe de Intervención avala esta operación de tesourería ao indicar que “o Concello ten capacidade financeira suficiente”. O edil de Facenda abondou en que “grazas a este anticipo o benestar dos veciños de Valga verase acrecentado, porque permitirá realizar un 30% máis de investimentos en obras e servizos a maiores do presupostado inicialmente”.}

^{Neste sentido, o concelleiro e o alcalde remarcaron que Valga é o concello da zona cos impostos e taxas máis baixos e, aínda así, conta con servizos que “son envexados por veciños doutras localidades que ven que en Valga se fan cousas e que tamén se benefician dos servizos que ofrecemos”.}

^{O grupo socialista e o concelleiro das Mareas votaron en contra deste punto.}

^{Na sesión ordinaria aprobouse por unanimidade unha moción do grupo popular para adherirse á campaña “Municipios Tolerancia Cero”, unha iniciativa de acción social fronte á violencia de xénero e en apoio das vítimas. A través desta moción o Concello comprométese a levar a cabo unha serie de iniciativas  para concienciar sobre a lacra social que supón a violencia machista, quedando aprobada a seguinte declaración: “Este é un concello que contra o maltrato ás mulleres ten tolerancia cero. Protexerase ás vítimas e colaborarase en perseguir aos maltratadores coa xustiza e coas policías. E realizaranse todos os esforzos para evitar que neste municipio se produza ningún maltrato ás mulleres”.}

^{Por último, aprobouse tamén por unanimidade unha moción de urxencia presentada polo grupo socialista para instar á Xunta a realizar un correcto mantemento da estrada autonómica PO-548”.}