- Iniciación á informática, a detección de virus ou a apliación Google Maps son algúns dos temas que se tratarán

- As actividades son gratuítas e os interesados en participar poden anotarse no Auditorio ou no Concello

^{Valga, 13 de xaneiro de 2022.}

^{A Aula CeMIT ten programadas para as vindeiras semanas varios seminarios e cursos para os que xa está aberto o prazo de inscrición. A detección de virus que poden danar os nosos dispositivos, a aplicación Google Maps ou iniciación á informática son algunhas das cuestións e temáticas sobre as que tratarán estas actividades.}

^{A primeira terá lugar o vindeiro martes, día 18, en horario de tarde (17:00 horas) e será o seminario web “Aprende a detectar de forma sinxela virus en mails e páxinas web”. Ao realizar buscas a través de Internet é habitual que acceder a páxinas que non son totalmente seguras ou que incluso poden conter virus informáticos que afecten ao noso dispositivo. Isto mesmo sucede cos correos electrónicos, nos que é frecuente recibir mensaxes enviadas falsamente dende contas que parecen dos nosos contactos ou de persoas coñecidas pero que, en realidade, agochan intencións maliciosas. Por iso é preciso saber como detectar estas páxinas e mails e como actuar para evitar que os virus poidan danar o noso dispositivo.}

^{Na última semana de xaneiro, o martes día 25, impartirase un novo seminario: “Google maps desde cero: Moito máis que un GPS”. Os GPS convertéronse nunha ferramenta moi útil para chegar a zonas que non coñecemos ben. Nesta liña, Google sumou funcionalidades a Google Maps ata convertela nunha das aplicacións fundamentais dos nosos teléfonos. Pero non soamente nos móbiles ten utilidade, senón que como ferramenta accesible desde o ordenador tamén pode darnos moita información interesante.}

^{As persoas que estean interesadas en participar poden inscribirse no Concello (986 55 94 56) ou no Auditorio Municipal (986 55 67 69).}

^{Ademais, tamén está aberto o prazo de inscrición noutros dous cursos que se impartirán proximamente: “Sácalle partido ao teu móbil” e “Iniciación á informática”. As datas nas que se celebrarán fixaranse unha vez estean formados os grupos de participantes.}

^{Todas estas actividades son gratuítas.}