- O proxecto tamén inclúe a rehabilitación ambiental da contorna, con revexetación e plantación de especies autóctonas

- O orzamento da actuación ascende a 500.915 euros

^{Valga, 18 de xaneiro de 2022.}

^{O alcalde, José María Bello Maneiro, asinou esta mañá na Deputación o convenio para a financiación do proxecto de construción dunha senda peonil e vía ciclable na contorna da Mina Porto Piñeiro, no marco do programa ReacPon para a execución de infraestruturas e dotacións singulares para a recuperación post-Covid. A sinatura contou tamén coa participación da presidenta da institución provincial, Carmela Silva.}

^{A lagoa Porto Piñeiro abrangue unha lámina de auga de 5’32 hectáreas, ocupando o espazo dunha antiga explotación mineira a ceo aberto da que se extraían arxilas para a elaboración de materiais de construción na desaparecida fábrica de Novo y Sierra. En total, todo o ámbito supera os 100.000 metros cadrados.}

^{As obras desenvolveranse na zona sur e consistirán na execución dunha vía que bordeará a lagoa e que estará habilitada para a circulación de peóns e ciclos. Terá base de grava, solo de cemento e bordo de formigón. Instalaranse, ademais, estruturas e varandas de madeira naqueles puntos nos que sexa preciso para maior seguridade.}

^{No marco deste proxecto levarase a cabo, ademais, unha restauración ambiental da zona. Aplicaranse tratamentos silvícolas, con limpezas e rozas selectivas para unha posterior revexetación. Recuperaranse a canle e a ribeira do rego do Regueiro, coa eliminación de especies invasoras e a plantación de árbores autóctonas coma salgueiros, freixos, carballos, castiñeiros ou bidueiros. Tamén se intervirá na ribeira oeste da lagoa, adecuando os perfís do terreo para un mellor acceso e coa implantación dunha comunidade vexetal de ribeira.}

^{O orzamento das obras ascende a 500.915 euros, dos que son subvencionados pola Deputación 425.778 e o Concello aportará 75.137.}

^{Con esta actuación ponse en marcha a recuperación ambiental, paisaxística e social da Mina Porto Piñeiro que, como xa aconteceu no seu día coa Mina Mercedes, o Concello quere converter nunha área de lecer de referencia no municipio e na súa contorna. A creación dunha cávea natural no borde da lagoa para a realización de eventos, unha zona de baño ao aire libre ou un espazo para un parque acuático son algunhas das iniciativas que se plantexan.}

^{No acto de sinatura do convenio de colaboración, o alcalde lembrou que a recuperación da Mina Porto Piñeiro enmárcase dentro dun proxecto máis amplo para a recuperación do patrimonio mineiro de Valga, que comezou coa execución do novo embarcadoiro do río Ulla (no lugar no que existía un antigo porto de carga e descarga de arxila e produtos cerámicos da factoría Novo y Sierra) e pretende continuarse coa recuperación da antiga liña de vagonetas aéreas mediante a que se transportaban eses materiais.}

^{Bello Maneiro salientou que “son proxectos moi importantes para Valga para atraer turistas e contribuír á fixación de poboación” e agradeceu á Deputación a financiación aportada. Pola súa parte, Carmela Silva felicitou ao Concello por este proxecto de recuperación dun espazo “de enorme valor” que “é un modelo a seguir” e prima a mobilidade sostible e segura para as persoas, vinculada á mellora medioambiental. Coincidiu co alcalde en que “a grande transformación” que vai supor esta actuación na Mina Porto Piñeiro constituirá “un incentivo turístico, porque Valga ten moitos lugares únicos”.}