- A marca, constituída xunto a Vilanova, Catoira e Pontecesures, presentouse esta tarde en Fitur

- Os concelleiros Malena Isorna e Pedro Calvo representan ao Concello na Feira Internacional de Turismo

^{Valga, 19 de xaneiro de 2022.}

^{Os concelleiros de Turismo e Cultura, Malena Isorna e Pedro Calvo, están a representar a Valga a Feira Internacional de Turismo que se celebra en Madrid dende hoxe e ata o domingo. Esta tarde participaron na presentación dos novos produtos de Mar de Santiago, a marca turística da que forma parte Valga xunto aos concellos de Vilanova, Catoira e Pontecesures. Un autobús turístico de percorrido circular, a organización de excursións dende Compostela e a credencial da ruta Mar de Santiago centran as apostas para a promoción deste destino turístico aproveitando este segundo Ano Xacobeo consecutivo.}

^{O acto de presentación desenvolveuse no stand de Galicia coa asistencia do vicepresidente da Xunta, Alfonso Rueda, a directora da axencia Turismo de Galicia, Nava Castro, o delegado territorial da Xunta en Pontevedra, Luis López, a vicepresidenta segunda do Congreso, Ana Pastor, e representantes dos catro concellos. Tamén participou o músico catoirense Roi Casal, que foi o encargado de poñer a banda sonora ao vídeo promocional do destino.}

^{O obxectivo de Mar de Santiago de cara a este ano é incrementar o número de visitantes aos catro concellos integrados na marca. Neste sentido, os representantes municipais destacaron nas súas intervencións que a finalidade é “consolidar o destino turístico atraendo peregrinos ao noso territorio para que naveguen á orixe das peregrinacións mediante a realización da Traslatio”. Malena Isorna salientou que “ofrecemos a posibilidade de vivir a experiencia única da natureza” e emprazou a todos a descubrir e coñecer este territorio.}

^{Mellorar a conexión marítima e fluvial para facilitar a realización da ruta, optimizar a interconexión entre os catro municipios, poñer en valor o patrimonio material e inmaterial do territorio e mellorar a experiencia dos visitantes para amosarlles que hai outras maneiras de facer o Camiño de Santiago son as diferentes accións nas que Mar de Santiago está a centrar os seus esforzos, buscando acordos con navieiras, guías turísticos e empresas de transporte.}

^{A orixe das peregrinacións a Santiago}

^{Mar de Santiago presentouse na feira turística coma o complemento perfecto para as peregrinacións, xa que se trata de descubrir a orixe das mesmas realizando o mesmo percorrido que fixeron, no século I, os restos do Apóstolo Santiago remontando o río Ulla. A marca contará coa súa propia credencial, en forma de concha de peregrino, que se entregará a aquelas persoas que realicen a Traslatio en barco e con puntos de selado en cada un dos concellos.}

^{Ademais, porase en marcha un autobús turístico que realizará percorridos circulares polos catro municipios con paradas nos principais puntos de interese. Deste xeito facilitarase o coñecemento do territorio por parte dos peregrinos, ao tempo que se buscará a interconexión entre este percorrido e a ruta en barco a través do Ulla.}

^{Como complemento a estas accións, prevese a formalización de acordos con compañías turísticas para que ofrezan a excursión Mar de Santiago e ofertaranse visitas guiadas nos catro concellos para aquelas persoas que queiran visitalos de modo independente.}

^{A participación de Mar de Santiago en Fitur continuará mañá coa celebración de varias xuntanzas de traballo con touroperdores e profesionais nacionais e internacionais do sector turístico. Ademais, os representantes da marca asistirán a varias presentacións no stand de Galicia e tamén a un acto na Embaixada de Rusia.}