- Os concelleiros de Turismo e Cultura agasallaron ao embaixador cunha botella de augarden branca e outra de herbas

- A delegación de Mar de Santiago realizou durante toda a xornada en Fitur promoción do destino turístico

^{Valga, 20 de xaneiro de 2022.}

^{A expedición de Mar de Santiago, da que forman parte os concelleiros de Turismo e Cultura de Valga, Malena Isorna e Pedro Calvo, continúa desenvolvendo traballo promocional en Fitur. Durante a xornada de hoxe, os representantes dos concellos que integran a marca (Valga, Vilanova, Catoira e Pontecesures) mantiveron diversas xuntanzas con turoperadores e profesionais do sector para presentar o destino turístico e dalo a coñecer a nivel nacional e internacional, poñendo en valor tanto a ruta marítimo-fluvial a Santiago coma os recursos propios dos catro municipios.}

^{No ámbito nacional, os membros da delegación de Mar de Santiago mantiveron un encontro co alcalde de Oviedo, Alfredo Canteli, co obxectivo de estreitar lazos coa cidade asturiana e multiplicar o fluxo de visitantes entre ambos territorios.}

^{Ademais, a promoción de Mar de Santiago chegará máis alá do Océano Atlántico a través da gravación dunha reportaxe para o programa “Territorio Santiago” da produtora Euroimagen.tv. Os representantes da marca participaron unha xuntanza con Karen Santamaría, integrante da produtora, para ultimar os detalles da rodaxe, que terá lugar o vindeiro luns. A peza audiovisual será emitida en América Latina, Estados Unidos e tamén en TVE2 e será, explica a concelleira Malena Isorna, “unha gran oportunidade para dar a coñecer nacional e internacionalmente a ruta Mar de Santiago e para que cada concello poña en valor os seus principais recursos turísticos, culturais e patrimoniais”.}

^{Outras das reunións nas que participou Mar de Santiago nesta xornada foron co gobernador de Oaxaca (México), Alejandro Murat, e co secretario de Turismo mexicano, Miguel Torruco, para buscar acordos de promoción conxunta ou incluso realizar un irmandamento. Nesta xuntanza co representante do goberno mexicano, os representantes de Valga e Pontecesures aproveitaron para promocionar tamén a súa gastronomía.}

^{Xa pola tarde, a delegación desprazouse á Embaixada de Rusia, onde tivo lugar a presentación do destino turístico Moscú-San Petersburgo. Neste acto a caña de Valga foi protagonista, xa que os concelleiros valgueses fixeron entrega ao embaixador, Yuri P. Korchagin, de dúas botellas de caña branca e de herbas (os licores gañadores do Concurso da Caña do País do pasado ano).}

^{O diplomático ruso xa tivera ocasión de degustar a augardente valguesa e comprobar a súa calidade no pasado mes de xuño, cando percorreu a ruta marítimo-fluvial realizando unha parada en Vilarello. Alí o alcalde, José María Bello Maneiro, fíxolle entrega dunha botella conmemorativa da Mostra da Caña do País.}