- Produtores destes dous lugares foron os gañadores do certame, que se celebrou entre o xoves e o venres

- Participaron un total de vinte e cinco licores, dos que catorce se clasificaron para a cata final

^{Valga, 29 de agosto de 2021.}

^{O Concurso da Caña do País xa coñece aos seus gañadores da edición de 2021. Produtores de Senín e Campaña repartíronse os premios ás mellores augardentes branca, de herbas e tostada tralas catas celebradas o xoves e o venres.}

^{Foron vinte e cinco as augardentes que se presentaron ao certame, das que catorce pasaron á cata final: cinco na modalidade branca, outras cinco de herbas e catro tostadas. Exerceron como catadores Manuel Blanco Picón, Mª Dolores Catoira Piñeiro, Juan Carlos García Busto e Ricardo Abuín Mariño, aos que se sumou este ano por vez primeira Marisa Vázquez Tubío.}

^{Aínda que o fallo se produciu o venres non foi ata onte á noitiña cando se deron a coñecer os gañadores, durante o acto de entrega de premios da XXXI Festa da Anguía e Mostra da Caña do País, que se celebrou no Parque Irmáns Dios Mosquera.}

^{A mellor caña branca, gratificada con 300 euros, foi producida por Concepción Figueira Tanoira, de Senín, se ben o premio foi recolido por Jesús José Potel Garabán. En segundo lugar clasificouse Antonio Santiago Gregorio “Tucho”. O seu fillo, Francisco Santiago, representouno no acto de entrega de premios.}

^{A modalidade de herbas foi a máis disputada xa que o xurado tivo que desfacer o empate que se produciu entre dous licores trala primeira votación. Finalmente, o primeiro premio (200 euros) foi para José Manuel Rodríguez Cerneira, de Campaña, e o segundo lugar ocupouno Mª Begoña Sanmiguel de la Torre, de Senín.}

^{Estes dous produtores foron tamén os vencedores na terceira categoría do concurso, caña tostada, aínda que invertíndose os lugares. Mª Begoña Sanmiguel foi a gañadora (200 euros) e José Manuel Rodríguez foi segundo.}