- O SAF saiu a licitación cun orzamento estimado de 2’08 millóns para os próximos catro anos

- A adxudicación está pendente da valoración da documentación técnica e da apertura das ofertas económicas

^{Valga, 25 de agosto de 2021.}

^{Catro empresas presentaron no Concello as súas ofertas para optar á adxudicación do Servizo de Axuda no Fogar (SAF) por un período inicial de dous anos, con posibilidade de dúas prórrogas ata un máximo de catro anualidades.}

^{As empresas que se presentaron ao concurso son Osventos Innovación en Servizos S.L., Sociser Galicia S.L.U., Idades S.L. e Son a túa axuda S.L. A mesa de contratación reuniuse nos últimos días para abrir os sobres A (documentación administrativa) e C (documentación técnica). Queda pendente apertura do sobre B, que contén as ofertas económicas.}

^{O SAF constitúe un recurso preventivo e asistencial que posibilita que as persoas maiores e dependentes permanezan na súa contorna de convivencia habitual, ofrecéndolles unha axuda de atención persoal que posibilita o seu desenvolvemento no propio domicilio e a súa integración comunitaria, evitando así situacións de illamento e exclusión.}

^{Este servizo saíu a licitación no mes de xullo, despois de que o Pleno aprobase o expediente de contratación e o gasto correspondente, que se estima en 2’08 millóns de euros durante os vindeiros catro anos.}

^{O obxecto do contrato é a atención domiciliaria de persoas que teñan limitada a súa autonomía persoal por motivos de índole física, psíquica ou social, ou en casos de desestruturación familiar. Teñen prioridade as persoas maiores con déficit de autonomía e persoas con discapacidade.}