- A primeira quenda, que durará ata finais de xullo, conta con trinta nenos participantes

- Participan en xogos, deportes e actividades educativas sobre igualdade ou o medio ambiente

^{Valga, 13 de xullo de 2021.}

^{A Escola de Verán organizada polo Concello para favorecer a conciliación laboral e familiar dos veciños de Valga durante as vacacións escolares deu comezo esta semana con todas as prazas cubertas na primeira quenda, que se prolongará ata finais de xullo.}

^{Trinta rapaces de entre 4 e 14 anos participan dende o luns nas actividades que se desenvolven no recinto do colexio Baño-Xanza de 9:00 a 14:00 horas. Nestas primeiras xornadas, realizaron dinámicas de presentación e comezaron a traballar sobre temáticas coma o coidado do medio ambiente, con iniciativas coma a realización dun mural con follas secas e flores que os propios nenos recolleron na contorna. A reciclaxe ou as enerxías renovables serán outros dos temas que traballarán no eido medioambiental.}

^{A Escola de Verán fomentará, ademais, valores baseados na igualdade de xénero e na concienciación dos rapaces para construír un mundo máis respectuoso, igualitario e xusto. Ao mesmo tempo, haberá espazo para o entretemento con actividades lúdicas, xogos, saídas e excursións pola contorna e deportes. Esta mañá, por exemplo, o grupo dos maiores xogaba ao brilé nas pistas deportivas do colexio.}

^{A situación de pandemia obrigou ao Concello a adoptar medidas para garantir a seguridade na Escola de Verán, que é gratuíta para as familias. Deste xeito, limitáronse as prazas a trinta inscritos por quenda e as actividades desenvolveranse ao aire libre, empregando os espazos abertos e o patio cuberto do colexio. Ademais, creáronse grupos burbulla.}

^{No mes de agosto, entre os días 2 e 20, haberá unha segunda quenda.}