- Os concelleiros Malena Isorna e Pedro Calvo representan ao Concello na Feira Internacional do Turismo que se inaugurou hoxe en Madrid

- O proxecto impulsado xunto a Vilanova, Catoira e Pontecesures divulga a ruta marítimo-fluvial e os atractivos culturais, históricos e gastronómicos deste territorio

^{Valga, 19 de maio de 2021.}

^{Valga presentou esta tarde en Fitur as súas credenciais como destino turístico como parte da marca “Mar de Santiago”, constituída xunto cos concellos de Vilanova, Catoira e Pontecesures para promocionar a ruta marítimo-fluvial e, da súa man, os demais recursos culturais, históricos, paisaxísticos e gastronómicos destes territorios.}

^{A concelleira de Turismo, Malena Isorna, e o concelleiro de Cultura, Pedro Calvo, están a representar ao Concello nesta Feira Internacional do Turismo. Esta tarde participaron na presentación “Mar de Santiago – Camiño á orixe” no stand de Galicia, coa asistencia da vicepresidenta segunda do Congreso, Ana Pastor, o vicepresidente da Xunta e conselleiro de Turismo, Alfonso Rueda, e de touroperadores, axentes de viaxes e outros representantes do sector turístico.}

^{“Mar de Santiago” quere potenciar o primeiro Camiño de Santiago da historia, a ruta tamén coñecida como “Translatio” pola que chegaron no século I os restos do Apóstolo procedentes de Jaffa, dando orixe ao fito xacobeo. En Fitur presentáronse as guías e folletos editados e a páxina web www.mardesantiago.com, que entrou en servizo esta mesma tarde e dende a que se divulgan os recursos turísticos cos que contan os catro concellos promotores. Durante o acto tamén se proxectou o vídeo promocional da ruta, con música de Roi Casal, no que cobran protagonismo a transición entre o mar e o río, o turismo de natureza, a gastronomía e o enoturismo e, no caso concreto de Valga, espazos como as fervenzas, a área fluvial de Vilarello, o Parque Irmáns Dios Mosquera ou o Museo da Historia.}

^{Na presentación interviron, en representación dos catro concellos, os alcaldes de Vilanova e Pontecesures. Gonzalo Durán calificou de “triste” que os peregrinos “despois do esforzo que supón gañar o xubileo e chegar a Santiago, collan un avión e marchen sen coñecer o noso territorio e sen saber que a poucos quilómetros de Compostela hai río, hai mar, hai cultura, hai gastronomía...”. De aí que “Mar de Santiago” non só teña entre os seus obxectivos promocionar a ruta marítimo-fluvial, senón tamén atraer a peregrinos doutras rutas para que, unha vez cheguen ao Obradoiro, conten con alternativas culturais e de ocio nos municipios de “Mar de Santiago”.}

^{Juan Manuel Vidal Seage, pola súa parte, remarcou que este é “o Camiño orixinal, o verdadeiro Camiño”, mentras que Ana Pastor referiuse á ampla “variedade de atractivos naturais, históricos, artísticos e gastronómicos” que poden ofrecer estes concellos.}

^{O encargado de pechar o acto foi o vicepresidente Alfonso Rueda, que louvou a iniciativa de Valga, Pontecesures, Catoira e Vilanova porque “Santiago necesita un mar”. O responsable autonómico de Turísmo apuntou que “o Xacobeo vai ser o motor da recuperación en Galicia”, á que puxo como exemplo de destino seguro pola diversidade de espazos abertos, áreas naturais e paraxes non masificadas que ofrece.}

^{A expedición de “Mar de Santiago” abriu a súa presenza en Fitur esta mañá asistindo á presentación do stand de Galicia a cargo do presidente da Xunta, Alberto Núñez Feijóo, realizando promoción da marca entre membros doutras delegacións e participando en videoconferencias con touroperadores para dar a coñecer a ruta marítimo-fluvial. Mañá participarán nunha segunda xornada de traballo na feira.}