- As persoas interesadas deben contar co graduado en ESO e poden inscribirse na Oficina de Emprego de Vilagarcía

- A actividade formativa comezará a finais de febreiro e terá unha duración de 680 horas

^{Valga, 8 de febreiro de 2021.}

^{O IES de Valga impartirá durante os vindeiros meses un curso de soldadura con eléctrodo revestido e TIG para o que xa está aberto o proceso de selección do alumnado.}

^{Poden participar nesta actividade formativa persoas desempregadas que teñan o graduado en ESO. Deben anotarse na Oficina de Emprego de Vilagarcía de Arousa, dende a que os candidatos serán chamados para a selección. O número de prazas dispoñibles é de quince.}

^{O curso dará comezo o día 22 de febreiro e impartirase polas tardes de 15 a 20 horas. Terá unha duración de 680 horas, incluíndo un módulo de 70 horas de riscos laborais. Os alumnos tamén realizarán unha semana de prácticas en empresas da contorna.}

^{Os contidos formativos do curso son os seguintes: procesos de corte e preparación de bordos; soldadura con eléctrodos revestidos de chapas e perfís de aceiro carbono con eléctrodos básicos e de rútilo; soldadura con eléctrodos revestidos de estruturas de aceiro carbono, inoxidables e outros materiais; interpretación de planos en soldadura; soldadura TIG de aceiro carbono, de aceiro inoxidable e de aluminio e aliaxes; e soldadura con eléctrodo revestido e TIG.}